Exelis Servicesip aalajangiineq naatsorsuutigisani naammagisimaarpaa
Suliffeqarfiup Exelis Services A/S-ip Pituffimmi sakkutooqarfimmi kiffartuussinermik tamarmiusumik ukiormanna oktobarip aallaqqaataani ingerlataqalernissani qilanaarivaa. Aamma unammillertimi naammagittaalliuutaasa amerikami oqartussaasunit itigartitsissutigineqarnerisa kingorna, oqaaseqartartoq Kim Rubjerg oqaluttuarpoq.
- Iluarisimaartupilussuuarput. Oqarsinnaanngilanga tupaallaatigalutigu. Erseqqilluinnarneranimmi isumaqartuarpugut - taamaapporlumi. Aamma oqaatigissavara Kalaallit Nunaanni sulilernissarput assut qilanaarigatsigu, KNR-imut taama oqarpoq.
Aamma atuaruk Amerikanske myndigheder blåstempler Thule-kontrakt
Greenland Contractors, Namminersorlutik Oqartussanit piginneqataaffigineqartoq, suliffeqarfillu MT Højgaard, Per Aarsleff aamma Copenhagen Arctic peqatigalugit Exelis Servicep Pituffimmi sakkutooqarfimmi kiffartuussinissamik isumaqatigiissutip suliariumannittussarsiuunneqarnerani ajugaanera naammagittaalliuteqartuuvoq.
Isornartorsiuisoqarnera paasiuminaatsippaa
Exelisip Danmarkimi suliffeqarfiunnginnera ilaatigut naammagittaaliuutigineqarpoq amerikamiut suliffeqarfiutaannit Vetrusimit, ilaatigut sakkutuut alapernaarsuinermut atortuinik nioqquteqartumit pigineqarnera pissutigalugu. Tamatumali naammagittaalliuutigineqarnera amerikamiut oqartussaasuisa itigartippaat.
Exelis Servicep isornartorsiorneqarnera Kim Rubjergip ataatsimut isigalugu paasiuminaatsippaa:
- Naagga, paasisinnaanngilluinnarpara, suliffeqarfiuvugummi Danmarkimi angerlarsimaffeqartoq. Danskit aktiaateqarluni ingerlatseqatigiiffiat tassaaginnarpoq danskit aktiaateqarluni ingerlatseqatigiiffiat! Kikkut piginnittoorpiarnersut apeqqutaanngilluinnarpoq. Taamatummi eqqarsartoqassappat, danskit suliffeqarfippassui Danmarkimeersuunavianngillat, soorlu danskit immiorfii assersuutigalugit.
Aamma atuaruk Juraprofessor: Thule er en tabersag
Naammagittaalliuut kingusinaarunneqarsimavoq
Amerikami naalagaaffiup naammagittaalliuuteqartarfiata aalajangiinerani ilaatigut allassimavoq, suliffeqarfiit allat suliap ingerlanneqarnerani siusinnerusukkut naammagittaalliuuteqarsimasariaqaraluartut, Exelisip Danmarkimi suliffeqarfittut inissisimanerata malittarisassanut naapertuutinnginneranik isumaqarunik.
Tamannalu Kim Rubjerg isumaqatigaa.
- Siusinnerusukkut qisuariarsimasariaqaraluarput, asuli ajorsareeramik naammagittaallioratik. Exelisip Danmarkimi suliffeqarfiunera tupaallannartortaqanngilaq. Tamanna aallaqqaataaniilli tamanit ilisimaneqareerpoq.
Exelisip arlaleriarluni erseqqissaatigereerpaa Pituffimmi sulisorineqartut tamarluinnaasa isumaqatigiissutit atuuttut malillugit sulisorerusullugit, aammalu ilinniartoqarnissaminik neqerooruteqarniarluni. Exelis Servicesilli oqaaseqartartuata, Kim Rubjergip, soraarsitsisoqannginnissaa neriorsuutigisinnaannginnerarpaa.
