Exelisip aalajangiiffigineqarnera Lidegaardip Præsidentip Illorsuani qaqinniarpaa

- Taamatut aalajangiisoqarnera tupaallaatigaarput. Tamanna miserratigissanngilara. USA-mut isumaqatigiissutitsinnut naapertuutinngilluinnarmat naammaginartinngilara, Martin Lidegaard TV2-mut taama oqarpoq.

Nunanut allanut tunngasunut ministeri pinerliinianik akiuiniarnermut atatillugu USA-miippoq, periarfissarlu iluatsillugu naammagittaalliutigineqartup aalajangiiffigineqarnera pillugu amerikami politikerit oqaloqatiginiarpai.

- Pentagonimi ullumi taamaaliorpunga, aamma Kerry (USA-p nunanut allanut tunngasunut ministeria, aaqq.) tamanna pillugu ullumi aamma oqaloqatigissavara. Aamma Susan Rice (USA-p Naalagaaffiit Peqatigiinni aallartitaa) Præsidentip Illorsuani oqaloqatigilerukku tamanna qaqissamaarpara, Martin Lidegaard oqarpoq.

AAMMA ATUARUK Exelis Servicesip aalajangiineq naatsorsuutigisani naammagisimaarpaa

Suliffeqarfiup Exelis Servicesip, Pituffimmi sakkutooqarfimmi kiffartuussinissamik isumaqatigiissutip suliariumannittussarsiuunneqarnerani ajugaasup akuerineqarnera, Lidegaard naapertorlugu, USA-p Danmarkillu illersornissamik isumaqatigiissutaannut naapertuutinngilaq.

- Amerikamiunut isumaqatigiissutitsinni erseqqilluinnartumik naqissuserneqarpoq danskit kalaallilluunniit suliffeqarfiutaat isumaqatigiissummik tunineqassasoq.

AAMMA ATUARUK Pituffik pillugu isumaqatigiissutip tunniunneqarnera amerikami naalakkersuisut akueraat

- Matumanilu suliffeqarfik allamit aqutaq pineqarpoq, atorneqarsinnaannginneralu isumaqatigiissutigigaluarparput. Taamaammat suliami matumani nipituuliorniarlunga aalajangerpunga, oqarlunga Kalaallit Nunaannut, Danmarkimut USA-mullu naammaginartumik aaqqiissuteqartoqarsinnaasariaqartoq, Pituffimmi sakkutooqarfik Kalaallit Nunaannit sapinngisamik annertunerpaamik pissarsiaqaatigineqarniassammat, danskit nunanut allanut tunngasunut ministeriat TV2-mut taama oqarpoq.