Nuummiinnaanngitsoq: Illoqarfinni arfinilinni portørit sulinerminnik unitsitsigallarniartut

Sulinermilli inuussutissarsiuteqartut kattuffiata immikkoortortaqarfii allat aamma utaqqisinnaajunnaarlutik suliniumajunnaarnissamik kajumissaaruteqartalerput.

Portørit sulinerminnik ullup qeqqanit unitsitsigallarnerat illoqarfinni arfinilini pissaaq, tassalu Uummannami, Ilulissani, Sisimiuni, Maniitsumi, Nuummi,  Narsami Qaqortumilu.

Dronning Ingridiup Napparsimmavissuani, Sanami, portørit sulinerminnik ullumikkut nal. 12-imit unitsitsigallarniarput. Sulisitsisuminnut, Namminersorlutik Oqartussanut, akissarsiat pillugit suli isumaqatigiissuteqartoqannginnera naammaginngilaat.

Portørilli kattuffianni SIK-mi siulittaasup, Jess G. Berthelsenip, isumalluarnissamut pissutissaqarsoraa.

- Taamaattumik neriuutigaara ulluni qaninnerni  immaqaluunniit sapaatip akunnerata tulliata aallartinnerani isumaqatiginiarnerit aallarteqqissinnaanngussasut, SIK-ip siulittaasua oqarpoq.

Ilaasortarpassuamili utaqqikatannerat paasilluarsinnaava.

AAMMA ATUARUK Portørit sulinerminnik unitsitsiniarnerat SIK-p nuannarinngilaa

- Immikkoortortaqarfiit arlallit sauliujumajunnaarnissamut suliniuteqaqqulluta piumasaqarput, siulittasoq oqarpoq erseqqissaatigaali suliumajunnaarneq pinnagu isumaqatigiinniarnissaq orniginartinnerullugu.

- Suliumajunnaarneq sakussat kingullersarissavaat, tamanna arlaannulluunniit iluaqutaanavianngimmat. Neriuppunga taasunga killitsigata isumaqatigiissuteqarsinnaassasugut, Jess G. Berthelsen oqarpoq.

Naalakkersuisut akissarsiat 92 ørenik amerlinissaannik portørinut neqerooruteqarpoq, taakkuli ikipparlaartut, Hansine Thorin, Dronning Ingridiup Napparsimmavissuani aamma portøriusoq isumaqarpoq.

- Ineqarnermut kiassarnermut meeqqerivinnullu akileereraangatta inuussutissanut atugassat sinneruttut naammanngillat, Hansine Thorin taama allappoq.

Qujaukitsoq mianersoqqusivoq

Naalakkersuisulli isumaqatigiinniarnermut akuliunniarsartik mianersuutigisariaqarpaat. Aningaasaqarnermut naalakkersuisoq Vittus Qujaukitsoq taama isumaqarpoq.

AAMMA ATUARUK Portørit tallimanngorpat sulinerminnik unitsitsigallarniartut

- Isumaqatigiissut siorna marsip qaammataani atorunnaarpoq, nutaamillu isumaqatigiissuteqarnissamut isumaqatigiinniarnerit suli naammassineqanngillat, illuatungeriit isumaqatigiissinnaanngimmata, Qanoruumi ippassaq unnukkut oqarpoq.

- Isumaqatigiinniartitaqarpugut, aamma taakku tatigalugit kommunillu sinnerluta aamma isumaqatigiinniarput, aningaasallu kisimi pineqanngimmata mianernartoqarpoq. Sulinermut atatillugu atugassaritinneqartut tapisiat, piffissat suliffiusartut il. il. Isumaqatigiissutini soqutigisat amerlasoorparujussuupput eqqorneqartut, taamaattumik tassuunakkut mianernartorpassuupput, Vittus Qujaukitsoq taama oqarpoq.