SIK: Innuttaasunik taasititsisoqarneratigut Inatsisartut pisariaarutissapput
- Tassami inuiaqatigiit apereqqaartuassagutsigut sunik aallartitsinialerlutalu taasisitsisarluta, taava qinersisarneq sumut iluaqutigissagatsigu? Qaqugukkut pilersitsisoqartassava taava? Taamaappat qinikkagut tatigisimanngilagut. Soormi taava qinersisassaagut, soormi taava partiilersussaagut?, Jess G. Berthelsen aperivoq.
Aalisakkat akiisa qaffakkiartornerat aalisartunut soorunami iluaqutaassasut taassuma oqaatigaa, nunattalu karsiata isertitai amerliartussasut, taamaattorli sulisartut akissarsiaat annertunerusumik aningaasaliiffigiumaneqarneq ajortut aamma oqaatigalugu:
- Sulisartulli akissarsiatigut qaffaaffigineqarpat? Aggorsimasuminernik tunineqarput, SIK-p siulittaasua oqarpoq, nangillunilu:
Aamma atuaruk Jess G. Berthelsen suli sorsuutissaqarpoq
- Aatsaallimi inuiaqatigiit pisuussutaasa, tassa aalisakkat raajallu akiisa taamarujussuaq qaffannerat ilaasortatsinnut, aalisagaatitsinnik suliarinnittunut assinganik sunniuteqartariaqaraluarpoq, suliffissuarni aalisakkerisut akissarsiaasa 100 procentimik qaffanneisigut, Jess G. Berthelsen oqarpoq.
Suliffeqarfiit tikisitanik sulisoqarnerujussuat taassuma aamma apeqquserpaa, pisiniarfiutillillu angisuut marluk, Brugsen aamma Pisiffik, tikisitanik amerliartuinnartunik sulisoqarnerat tikkuartorlugu:
- Periarfissallu marluinnaapput ilinniartitseriaaserput ajorsimavoq, imaluunniit kammalaatersorluni pisariaqanngitsumik avataaniit tikisitsiortorneq ingerlanneqalersimasoq. Tamannalu pissusissamisuunngilaq, minnerunngitsumik nunatsinni suliffissaaleqineq 10 procentit sinnerlugu inissisimatillugu, SIK-p siulittaasua Jess G. Berthelsen ilaatigut oqarpoq.