Jess G. Berthelsen suli sorsuutissaqarpoq

- Takorluugaqaraanni aammalu anguniagaqaraanni taava oqariartuutissat ajornarneq ajorput, SIK-mi siulittaasoq Jess G. Berthelsen oqarpoq.

SIK-mi ilaasortat aningaasatigut eqqorneqarsinnaanerat pissutigalugu Tele namminersortunngorsarneqarniarnera Jess G. Berthelsenip akerleralugu oqaatigaa.

Aamma atuaruk Telemik ilisimasallip namminersortunngorsaaaniarneq “silaqanngitsuliornerunerarpaa”

Aamma suliffissanik pilersitsisoqarnissaa anguneqassammat uranimik qalluisoqarnissaa Jess G. Berthelsenip tapersersorpaa.

SIK-mi siulittaasumik ukiut sisamakkaarlugit qinersisoqartarpoq. Taamaakkaluartoq Nunatsinni sulisartut katuffianni Jess G. Berthelsen 1990-imili  siulittaasutut qinerneqartarpoq, siulittaasutullu ukiut 25-issaanni maannakkut inissisimalluni. 

SIK-lu piffissami tassani angusaqangaatsiarsimasoq, siulittaasoq isumaqarpoq.

- Kalaallisut nammineq oqaatsigut atorlugit isumaqatigiinniarsinnaalerneq, taamaalillunilu aamma isumaqatinut kalaallisut allassimasut taakku pingaarnertut inissinneqarneri, pisortat eqqarsaatigalugit, soraarnerusiaqarnissamik aningaasaateqarfik angusaq maannakkut siunissamilu pitsaalluinnartuusoq, ilaasortagut massakkut inuusuttuusut soraarninngorpata. Taassuma saniatigut socialfondi napparsimasut ilaatigullu danmarkimukartariaqartartut aappatik ilagisinnaaniassagamikkit uagutsinninngaanniik akiliunneqarlutik, Jess G. Berthelsen oqarpoq, SIK-llu inuusuttaanik pilersitsisoqarsimanera angusaq pingaartuusoq aamma oqaatigalugu.

Suli siulittaasuunissaminut nukissaqarpoq

Jess G. Berthelsenip sulisartut ukiorpassuarni sullissarigaluarlugit, SIK-mi siulittaasutut tunuarnissaminik suli pilersaaruteqanngilaq.

- Timikkut tarnikkullu suli nukissaqarlunga misigisimavunga. Kisianni uanga naalagaanngilanga. Immikkoortortaqarfinni ilaasortaatigut naalagaapput, taakkummi qinersisartuugamik. Taakku aaliangissavaat ukiut qassit siulittaasuutinniarnerlunga, Jess G. Berthelsen oqarpoq.