SIK: GC-p Pituffimmi sulisorisai kalaalertaqarpianngillat

Greenland Contractorsip Pituffimmi sakkutooqarfimmi kiffartuussinissamik isumaqatigiissummik annaasaqarnerata Nunatsinni Danmarkimilu oqallisigineqarnerani, kalaallinit suliffigineqartut qasserpiaanersut ilanngutissallugu pissusissamisoorpoq.

Isumaqatigiissut aningaasatigut pissariaqarfiulluartoq ingerlatseqatigiiffimmut amerikamiunit pigineqartumut Exilis Servicesimut annaaneqarmat, Greenland Contractorsip tungaanit oqaatigineqarpoq Pituffimmi kiffartuussinissamik isumaqatigiissut Kalaallit Nunaannut pingaaruteqarluinnartuusoq, ingammik nunaqavissut suliffissaat ilinniartullu sungiusarfissaat eqqarsaatigalugit.

- Taamatulli oqartoqarnera piviusumut naapertuuteqqissaanngilaq, kalaallimimmi nunaqavissumik Pituffimmi 2008-imili atorfinitsitsisoqarsimanngilaq.

Aamma atuaruk Pituffimmi kiffartuussinermut isumaqatigiissuteqarnissaq Folketingetimi amerlasuunit taperserneqarpoq

Aamma atuaruk Pituffik pillugu siunnersuut akuerineqarpoq

- Greenland Contractorsip taamaaliornermigut siunertaasimagaluartunik saneqqutsiniarnera annilaarnartuuvoq, tassami nunaqavissunik sulisoqarnissaq peqatigitillugulu ilinniartut kingornatigut inuiaqatigiinnut kalaallinut iluaqutaasussamik sungiusarfissaqartinnissaat siunertaamma, SIK-p siulittaasua, Jess G. Berthelsen, tusagassiorfinnut nalunaaruteqarluni taama allappoq.

SIK naapertorlugu Greenland Contractorsip kalaallinik nunaqavissunik sulisoqarnissamik pingaartitsinissamik aammalu ilinniartunik ilinniartitsinissamik isumaqatigiissut naammassisimanngilaa, kiffartuussinissamillu isumaqatigiissummik pissarsisumit - Exilis Servicesiuppat, Greenland Contractorsiuppat allaqqinnaajuppalluunniit - tamatuma malinneqarnissaa SIK neriuutigaa.

Aamma atuaruk Greenland Contractors Pituffimmi sullissiunnaassaaq