SIK: Aningaasat sulisitsisunit aaneqarsinnaapput
20 million koruuninik ujarlerneq maanna aallarteruttorpoq, piffissarli sivikitsuarakasinngoreerpoq. Aningaasaqarnermut Naalakkersuisup, Maliina Abelsenip siunniussaraa neriuutigalugulu, politikerit marlunngornerutinnagu 20 millionit koruuninik matussusiisinnaasunik siunnersuuteqarnissaat.
- Sulisitsisut qassinik sulisoqarnerlutik eqqortumik nalunaaruteqartarnersut misissorneqartariaqartoq isumaqarpunga. Aammalu qulakkeerneqartariaqarpoq sulisitsisut akiliutaat Nunatta Karsianut ilumut tuttarnersut, Jess G. Berthelsen oqarpoq, nangillunilu:
Aammali allanik tigussaanerusunik SIK-p siulittaasua siunnmersuutissaqarpoq, soorlu aatsitassarsiulernermi suliffeqarfissuit Nunatsinnut tikittartut ujarlernerminnut atatillugu 10 procentimik akileraarusersuinikkut Nunarput aningaasanik isertitaqarsinnaakutsoortoq. Tassalu tamannarpiaavoq Siumup siulittaasuata, Aleqa Hammondip siunnersuutigisaa. Aleqa Hammondip naatsorsuutigaa suliffeqarfiit nunanit allaneersut akileraarutinut akiliisarnerisa aammalu taakkununnga akitsuusiinikkut Nunatta karsia 332 millionit koruuninik iluanaarsinnaasoq.
Siumup taama siunnersuuteqarnera illuatungilerlugu Aatsitassanut Naalakkersuisoq, Ove Karl Berthelsen oqarpoq, taama iliortoqassappat Nunatsinni aatsitassarsiornissaq annikillissasoq.
Jess G. Berthelsenili oqarpoq tamanna ersissutigisariaqanngitsoq.
- Maannakkut oqallinneq ima nipeqarpoq; mianersuuttariaqarput suliffeqarfissuit maani Nunatsinni aatsitassarsiorniarpata akileraarutinik akitsuutinillu annertuallaanik akiliisinngittarnissaat. Saviminissaq nunarsuatsinni maanna atorfissaqartinneqaqaaq, tassalu ilaatigut tamanna aqqutigalugu Nunatta karsiata amigartoorutissaanik aatsitassarsiorniat matussusiisinnaakutsoorput.
Nunatsinni innuttaasut, sulisartullumi aningaasaataannik aallerluni matussusiiniarneq pissanngitsoq, Jess G. Berthelsen aamma oqarpoq:
- Taaginnarsinnaavarput nunat allamiut Nunatsinnut qissattariartut maanna ullormut 150 koruuninik akiliisillugit aalisartinneqartarput uffa annertunerujussuarmik akiliisarsinnaagaluartut. Jess G. Berthelsen taama oqarpoq, assersuutitullu taallugu, Islandimut qissattariarniaraanni aatsaat 5000 koruuninik akileeqqaarluni qissattartoqartartoq.
Aningaasanut Inatsimmi 20 millionit koruuninik amigartoornissap qanoq matussuserneqarsinnaanera Sulisitsisut Peqatigiiffiannut aamma apeqqutigigaluarparput, taakkuli oqaannarput 20 millionit koruunit taama suunngitsigisut ajornartorsiutitut taasariaqanngitsulluunniit.
