SIK: SIK: Akileraartarnermut aaqqissuusseqqinneq ajunngilaq, aningaasalersorneqarnerali ulorianarpoq
IA-p Siumullu akileraartarnermut akitsuusiisarnikkullu aaqqissuusseqqinneq tallimanngornermi atsiorpaat.
SIK-p siulittaasua, Jess G. Berthelsen aperigaanni aaqqissuusseqqinnerit pitsaasuupput. Kisianni aamma ulorianartoqarsinnaasut taassuma erseqqissaatigaa.
- Annertuvoq 360 millionit missaani eqqartorpagut, aningaasarpassuupput. Taakkulu tassa ilaasortatsinnut amerlanerpaat tuttussaapput, taamaattumik tassuuna iluarisimaarpara.
Aningaasarsiatigut isertitakinnerpaat aamma SIK malillugu akissarsiallit katillugit 28.000-t missaaniittut akileraartarnermut aaqqissuusseqqinnermi pissarsiaqarnerpaanerat Sulinermik Inuussutissarsiuteqartut Kattuffiannit pitsaasutut ilanngullugu nalilerpaat.
- Uagutsinnut isumaqartorujussuuvoq, pissakinnerit massakkut aningaasanik amerlanerpaanik tunineqarput. Tassa imaappoq taamaalilluta immaqa naligiinnerulilaalissaagut, massakkummi pissaqarnerit pissakinnerillu assigiinngissutaat ima annertutigimmat, taanna oqarpoq.
Taamaattoq akileraartarnikkut akitsuusiisarnikkullu aaqqissuusseqqinnerup qanoq aningaasalersorneqarnissaa apeqquserpaa.
- Soorunami nuannarinerpaajusimassagaluarpara isertitat nutaaninngaanniik taanna aningaasalerneqarsimagaluarpat. Maannakkut allaninngaanniik aalliinnarpugut pioreersunik, aningaasanik nutaanik pilersitsinngilagut.
Aningaasalerneqarneralu Grønlands Bankenip pisortaata, Martin Kviesgaardip aamma apeqquserpaa.
Taassuma aaqqissuusseqqinnerup qanoq aningaasalersorneqarnissaanut pilersaaruteqannginnera sanngiiffiusoraa.
- Aningaasalersorneqarnera erfarsornalaarsinnaavoq. Aningaasalersornissaa qulakkeerniarlugu iliuuseqartoqartariaqarpoq, taamaaliortoqanngippat nunatta karsia aappaagu amigartuussaaq, taanna KNR-imut sapaatip akunnerani siusinnerusukkut tikkuaavoq.
Pisortani sipaarnerit
Pisortat allaffissorneranni sipaarniarnikkut aaqqissuusseqqinnernut aningaasaliisoqassasoq, aningaasaqarnermut naalakkersuisup, Erik Jensenip (S) aaqqissuusseqqinnerit pillugit tusagassiortunik tallimanngornermi katersortitsinermi oqaatigaa.
Tamannalu SIK-p siulittaasuata ernumassutigaa.
- Soorunami ilaasortatsinnik soraarsitsisoqassappat tamatuma kingunerisaanik aamma pitsaasuussanngilaq, Jess G. Berthelsen oqarpoq.
Taassuma 360 millionit koruunit piffissap ingerlanerani amigaataalerumaartut erseqqissaatigaa. Aaqqissuusseqqinnerullu aningaasalersorneqarnera aningaasarsiorfinnik pioreersunik pimmat illuatungilerpaa.
- Isumaqarpunga pingaaruteqartorujussuaq aningaasarsiorfinnik nutaanik nassaarnissarput. Taakkua massakkut 360 millionit aamma arlaatigut aasariaqarpagut arlaatigut aningaasarsiorfinnik annertunerusumik pilersitsinitsigut. Soorunami taakkua aningaasat qaquguugaluarnersoq aamma amigaatigilertussaagatsigit.
- Maannakkullu uanga takusinnaasatuara tassaavoq aatsitassarsiorneq, annertuumik ataatsikkut pissarsissagutta, taanna oqarpoq.
Aningaasassaqartoqarnerulissasoq
Taamaakkaluartorli aaqqissuusseqqinnerup akuerineqarnera nuannaarutigaa. Tamannami sulisartut 200.000 koruunit 249.999 koruunillu akornanni isertitallit, qaammammut 1.000 koruuni sinnilaarlugu kaasarfimmioqarnerulernissaannik isumaqarpoq.
SIK-mi ilaasortat akiliisartut 5.000-it amerlanerpaartaat aaqqissuussqqinnermit iluaqutisserneqassasut taassuma oqaatigaa.