Suliffillit qaammammut 1.000 koruuninik isertitaqarnerulernissartik naatsorsuutigissavaat

Akileraarutit akitsuutillu pillugit aaqqissuusseqqinnissamik isumaqatigiissut Naalakkersuisunit ullumi aqqummiuneqarpoq. 

Aaqqissuusseqqinneq "Nunarput najoruminarnerulersitsigu"-mik taaneqarpoq. Politikerillu Siumumeersut IA-meersullu innuttaasut suliffillit qaammammut 1.000 koruunit missaannik annerusumik isertitaqalernissaannik saqqummiipput. 

Tassa suliffeqaruit siunissami qaammamut 1.000 koruuninik isertitaqarnerulerlutik kaasarfinnut ikisisinnaalissaatit. Akileraartarnermik aaqqissuusseqqinneq 360 milllionit koruuninik naleqartoq aappaagu januaarip aallaqqaataani atuutilissasoq naalakkersuisunit siunniunneqarpoq. 

Tusagassiortunik katersortitsineq Aningaasaqarnermut Akileraartarnermullu Naalakkersuisumit Erik Jensenimit (Siumut) aqunneqarluni saqqummiunneqarpoq.

- Isertitakinnerusut akunnattumillu isertitallit aningaasaateqarnerulernissaat taamaalillunilu ulluinnarni oqinnerusumik inuuneqalernissaat anguneqarpoq, Erik Jensen (Siumut) oqarpoq. 

Sulinermut ilanngaat qaffanneqassaaq

Akileraartarnermut aaqqissuusseqqinnerup 360 millionit koruuninik naleqartup saniatigut, inummut ilanngaatip qaffanneqarnissaa aamma isumaqatigiissutaavoq. 

Tassa imaappoq ilanngaat ullumikkut 48.000 koruunimiittoq, 2025-miit 60.000 koruunimut qaffanneqassaaq. Tassalu ukiumut isertitanit siullernit 60.000 koruuninit akileraartannginnissamik kinguneqassaaq. 

Aamma ukiumut 500.000 koruunit ataallugit isertitallit aningaasaateqarnerulissapput. 

Sulinermut ilanngaatit 172 millionit koruuninit qaffanneqarneratigut tamanna anguneqarpoq. Tassa inuit ukiumut 500.000 koruunit ataallugit isertitallit, ilanngaatit qaffanneqarnissaannik naatsorsuuteqarsinnaapput. 

- Inummut ilanngaatip sulinermullu ilanngaatip allanngornerisigut, sulisartut assersuutigalugu 200.000 koruunit 249.999 koruunillu akornanni isertitallit, 1.000 koruuni sinnilaarlugu aningaasarsiaqarnerulissapput, Erik Jensen oqarpoq. 

Akerliarnilli ukiumut 500.000 koruunit sinnerlugit isertitallit ilanngaammik taassuminnga iluaquserneqarnavianngillat. Taakkuli inummut ilanngaat naammagiinnartariaqassavaat, taannalu oqaatigineqareersutut 60.000 koruuninut qaffanneqassaaq.