Sibiriami kiarujussuallarmat Qaasuitsup killingata avannaa aatsaat taama kiatsigigunartoq

Qaasuitsup killingata avannaani illoqarfiup Sibiriamiittup kiassusia arfininngornermi uuttortarneqarmat, aatsaat taama kiatsigigunartinneqarpoq. Tuluit TV-qarfiat BBC ataasinngornermi unnukkut taama allappoq.

Illoqarfik pineqartoq tassaavoq Verkhojansk. Taanna Ruslandip avannamut kangianiippoq, tassanilu aatsaat taama kiatsiginerani 38 gradit anguai. Uuttortarneranili paasisat uppernarsineqarnissaat utaqqimaarneqarpoq.

- Nunarsuarmi nunani assigiinngitsuni maannamut kiannerpaaffiit issinnerpaaffiillu qaangerneqartuaannarput. Kisianni Issittoq nunarsuup sinneranut sanilliullugu sukkanerusumik kiatsikkiartorpoq, silap pissusia pillugu immikkut ilisimasalik University of Bristolimeersoq, Dann Mitchell, BBC-mut oqarpoq.

- Taamaammat nunarsuup ilaani tamaani aatsaat taama kiatsiginera tupaallaatissaanngilaq. Taamalu qanittukkut pisoqaqqittarumaarpoq.

AAMMA ATUARUK Maajip qaammataa ukiuni 39-ni aatsaat taama kiatsigisoq

Aviisi The Independent naapertorlugu nunarsuup ilaani tamaani kingullermik kiannerpaaffeqarpoq, Alaskami Fort Yukon 1915-imi uuttortaanermi 37,7 gradinik kiattoq paasineqarmat. 

Verkhojanskip kiarujussuartarnini, ukiukkullu isserujussuartarnini, ilisimaneqaatigaa.

Illoqarfik 1892-imi februaarip qaammataani isserujussuallarmat 67,8 gradinik issittoq uuttortaanermi paasineqarpoq, taamanikkullu aatsaat taama issitsigaluni.

Januaarimilu 40 gradit missaannik issikkajuppoq.