Tasiilami akiliisinnaajunnaartoqarnerani Sermersooq suliniuteqalersoq

Ingerlatsiviup akiliisinnaajunnaartoqarnerani ilaatigut meeqqerivimmik nutaamik meeqqanut 88-inut inissalimmik sanaartugaqarpoq, soorlu aamma illoqarfiup kujasinnerusortaani kuuffiit aqqutaannik pilersitsiniarluni sulissuteqartoq.

Aamma atuaruk Tasiilami sanaartornermik suliffeqarfik akiliisinnaajunnaarluni matuvoq

Sanaartornermik immikkoortortaq sulianik sukkanerpaamik ingerlatseqqinnissaq anguniarlugu aaqqiissutaasinnaasumik suliaqartoq, kommunimit aamma erseqqissarneqarpoq. Meeqqeriviliassaq matusanngoreerpoq ukiornissaanullu ernumanarani. Inissianik qulinik sanaartukkanit arfineq-pingasut aamma matusanngoreerput. Inissialiat marluk ukiortinnagu isumannaartariaqarput.
 
- Qularutigineqassanngilaq Viking Greenlandip akiliisinnaajunnaarnera aningaasaqarnermi annaasanik nassataqassasoq aamma Kommuneqarfik Sermersuumi suliat ilaqqinnerannik, maannakkorpiarli Tasiilami innuttaasunut atugassarititaasunut tunngassutillit aaqqiissuteqarfigineqarnissaat pingaarnerutillugit suliniarpugut, Kommuneqarfik Sermersuumi pisortaq Steffen Ulrich-Lynge oqarpoq.
 
Viking Greenlandimit ulluinnarni suliassat arlaqartut aamma suliarineqartaraluarput, soorlu Tasiilap ilarujussuanik aputaajaasarlutik.

Aamma atuaruk Venture Greenland akiliisinnaajunnaarneq pillugu: Piginneqataassutigut annaavagut

Suliassarlu taanna kommunip namminermit suliarisarallassavaa, aaqqiissummik ataavartussamik pilersitsisoqarnissaata tungaanut.
 
Akiliisinnaajunnaarnerup kinguneranik Tasiilami sulisut 30-t suliffissaarupput Isumaginninnermut, Inuussutissarsiornermullu Ingerlatsivik ikiorsiilluni sulisunut Kommuneqarfik Sermersuumi innuttaasunut akissarsisitsinissami tullermi aningaasarsianik tunniussissaaq. Aningaasat tunniunneqartut Akissarsiallit Qularnaveeqqusiiffiannit kingusinnersukkut utertinneqarumaarput.
 
Viking Greenlandip akiliisinnaajunnaarnera Kommuneqarfik Sermersuumut qanoq kinguneqassasoq suli ilisimaneqarluanngilaq.