Sermersooq nutaanik aaqqissutissarsiortussanngorpoq
Timitaqarpallaanngitsitut immaqa nipeqarsinnaavoq, kommunimulli ilusiliap ullumikkut atorneqartup aningaasalersornissaanut siunissami aningaasassaqarnavianngilaq, taamaammat kommunalbestyrelsi nutaanik eqqarsarluni nukiit inuiaqatigiinni pigineqartut pitsaanerusumik atortariaqassavai.
- Suleqatigeeriaatsinik nutaanik nassaarniartariaqarpugut, ammanerusariaqarpugut inuiaqatigiinnilu innuttaasut akuutinnerussavagut suliassallu agguataarnissaannut periaatsinik nutaanik nassaarniassalluta. Nutaanik eqqarsassaagut, Asii Chemnitz Narup oqarpoq.
Demokraatit gruppianni siulittaasup Anda Uldumip isumaqatigiissummik naammagisimaarinninnera aamma ersarippoq.
- Isumaqatigiissut tamaat isigalugu naammagisimaartupilussuuara, Demokraatimmiv anguniagarpassuinut naapertuupput, Anda Uldum oqarpoq.
Saqqummiussinermi ilaatigut nassuiaavoq, suliniteqarfissat tamaaasa partiinit marluusunit isumaqatigiissutigalugu, imaassanngitsorli isumaqatigiissut allanngortinneqarsinnaanngitsoq, politikerillu siunertaat naapertorlugit immikkoortut ataasikkaat allanngortinneqarsinnaassasut.
Ineqarneq ilinniartitaanermullu politikki isumaqatigiissummi qitiusutut tikkuartorpai.
- Isumaqatigiissut siammasissupilussuuvoq aamma qinigaaffimmi aggersumi anguniarniagassavut arlalissuupput. Soorlu assersuutigalugu utaqqisut allattorsimaffiini allatsissimasut ikilisarniarneqarnissaat, Nuummi Tasiilamilu annertuumik ajornartorsiutaasutut ilisimasarput. Aamma meeqqat atuarfiata pitsaanerusumut kivinniarnissaa misilitassatta ilagissavaat, Demokraatit gruppianni siulittaasoq oqarpoq.
Isumaqatigiissutip matuma ilisarnaatigaasa ilagaat avatangiisinik eriaginninnissaq aammalu avatangiinik qajassuussilluni ingerlatsiniarnissaq.
Asii Chemnitz Narup erseqqissarpaa, illoqarfiit pingaarnersaanni pisortat assartuussinerisa pilerinarsarneqarnissaa sulissutigineqassasoq, inuillu bussimut ilaanissaannut allatut pilerisaarneqarsinnaassanngippata immaqa biilersinnaannginnissaq immaqa iluaqutaasinnaavoq.
- Bussinik pigeriikkatsinnik pitsaanerusumik atuinissaq pisortallu assartuussinerisa atorneqarneqarnerunissaa namminerlu biilerisanik atuinerup annikillisarneqarnissaa. Maluginiartariaqarpat ullunik biilerfiunngitsunik eqqusserusunnerput, ilami Nuumi biilerparparsuaqarmat, Asii Chemnitz Narup oqarpoq.
Ataatsimiititat assigiinngitsut inuttalersorneqarnissaat suli inissivissorneqanngilaq, borgmesterip tulliatut siullertut atorfiup ataatsimiititamilu siulittaasuuffik Demokraatit pissarsiarissagaat maanna qularnarunnaareerpoq.
