Sermersooq minguittoorusuppoq
![](/sites/default/files/styles/image_934x467/public/article_images/sermersooq_politikere_pa_island.jpg?itok=ZC0KMXiY)
- Kommuneqarfik Sermersooq eqqagassalerinermut imikkullu saliinermut pilersaarutaasa piviusunngortinneqarnissaat pillugit annertuumik kommuni suliassaqarpoq. Taamaattumik paasisassarsiornitsinni suut aaqqiissutaasinnaasut paasiniaavigaagut isumassarsitinneqarluarlutalu, Sanarfinermut Avatangiisinullu Ataatsimiititaliap siulittaaasua, Mille Søvndahl Pedersen Kommuneqarfik Sermersuup nittartagaanut oqarpoq.
Nuummi misiliineq nutaaq
Kommuneqarfik Sermersuup kissaatigisaralugu suliniutaasa ilagaat, Nuup illoqarfiani perusuersartarfiit imaanut kuutsiinnarneqartarnerisa taamatikkikartuaartinneqarnissaanik pilersaarut. Tamannalu pillugu misileraaneq siulleq aggustip aallartilaarnerani ingerlanneqarpoq. Tassa saliinermi atortoq Norgemiit tikisinneqareersorlu perusuersartarfinnit igitat salinneqareerlutik imaanut kuutittarneri misiligarneqarluni.
Nunanut eqqaamiutsinnut paaasisassarsiornermi, Islandimi imermut saliivit, saliinermi pingasunik aqqusaartagaqartoq ataatsimiititaliamit takuniarneqarpoq aamma takuniarneqarluni Akureyrip innaallagissiorfiata eqqakkanik ikuallaavia, tassani plastikkit eqqakkat ikuallanneqarnerisigut tamassuma nukissiuutitut atorneqartarnera paasiniarneqarluni.
- Nunat eqqaamiugut eqqakkat pillugit pissaganartunik ineriartortitsisimapput. Tamakkulu atorluarneqarsinnaaneri pillugit kommunitsinnut apuussassaqarpugut ineriartortitsinitsinni atorluarsinnaasatsinnik, ataatsimiititaliap siulittaasua, Mille Søvndahl Pedersen oqarpoq.
Savalimmiuni takornarissat amerlisut
Ataatsimiititaliap paasisassarsiornerminni Savalimmiuni mittarfik Vagar aamma paasisassarsiorfigaat. Tassani oqaluttuunneqarlutik mittarfiup tallineqarnerata kinguneranik tamanna Savalimmiut takornariaqarneranut siuarsarneqarneranullu qanoq iluaqutaatigisimasoq.