Sermersooq: Aneerasaartarfiup akunnera sanaartortitsisup akisussaaffigaa

Meerannguamilli Tuapannguani inissiat ilaanniit nakkartoqarmat soorunami aneerasaartarfiiit meeqqanik pinnguarfigineqassagunik isumannaassusaat eqeersimaarfigineqarnerulersimapput.
 
Isumannaatsuunissaannut akisussaasut tassaapput sanatitsisut, tassalu Illuut uani akisussaasuuvoq. Illuut siunnersortimik peqateqarluni sanaartortitsisup Permagren-ip sanaartornermi aalajangersakkat malissimanerai qulakkeertussaavaat.
 
Sanaartornermut kommune aamma peqataavoq; sanaartornissamut akuersisutut naammassimmatalu iserterfigineqarsinnaanerinik akuersisutut.
 
Iain Mcllquham Schmidt, Kommuneqarfik Sermersuumi sanaartornermut avatangiisinullu immikkoortortaqarfimmi pisortaangallartup naqissuserpaa akisussaassuseq namminerminniinnani sanartortuniittoq.
 
Sanaartukkap naammassinerani tunniussinermi siunertaanngilaq sanaartukkap pitsaassusaa isumannaatsuuneralu akuersissuteqarfigissallugu. Akuerisassarli unaavoq, sanaartornissamut titartakkat kommunip akuerisimasai malinneqarsimanersut, illuliorfissamullu akuersissut malinneqarsimanersoq ilaalu ilanngullugit.
 
-Quleriiaat qummut ilasimaneraat. Arlaanni queeraliorsimanersut. Naqqup ataanut isaariaq assersimannginneraat. Aap ikuallattoqalersillugu qimaaffissiaqarpoq. Eqeersimaaffissat taamaattut, inissiat iluamik oqorsarneqarsimanersut kommunimit misissorneqartanngillat. Sanaartortoqarsimatillugu inernera misissuiffigisanngilarput. Sanaartortup tamakku eqqanaassallugit suliassaaniimmata.
 
Uani aamma eqqartorneqanngillat iikkat najummisut oqorsaatiluunniit. Isertuanngitsumik eqqartorparput aneerasaartarfiup iikkallu katinneranni putoq angivallaartoq, allaat meeraq nakkarsinnaalluni. Misissuineq qanoq ililluni pitsaasuusinnaava tamakku malugineqanngippata?
 
- Pisoq misissuiffiginngilara, aneerasaartarfiit suli ikkunneqanngitsut akuerisimasinnaavarput. Sorpassuusinnaapput sanaartukkami misissuiffigerusunngisagut. Aneerasaartarfiit assiaqutaat misissugassatsinni allassimasunut ilaanngillat.
 
Aneerasaartarfiit assiaqutaasa eqiingaffiginnginnerisa Tuapannguani inissiani aneerasaartarfiit ulorianartuuneri arajutsineqarsimasinnaapput. Sermitsiaq.ag nalunaaruteqarpoq imaassinnaasoq Tuapannguani inissiat allat aneerasaartarfii aamma ajornartorsiuteqartut. Taamaattumik siunissami tamakku nakkutigeqqissaarneqartariaqassapput.
 
- Tusagassiuutini saqqummiussat ilumoornersut malinnaaffiginikuunngilakka, uatsinnili oqaloqatigiinnitsigut isumaqatigiippugut arlaannut takuniaangaangatta aamma assiaqutit alakkartalerniarlugit, Iain Mcllquham Schmidt oqarpoq.
Tassa kommunip sanaartukkani isumannaallisaanermi aalajangersakkat nakkutigisassarinngilai. Sanaartortup nammineq tamakku usumagisassarai.
 
- Suleqatigiissitamik aalajangiisartoqanngilaq sanaartukkanik misissuisartumik. Sanaartortup naammassisaq misissuiffigisarpaa.
 
Misissuisartussanik peqartariaqarnersoq Iain Mcllulain Schmidtip eqqaanngilaa, akuersaarpaali arlaannik ajortoqarsimanera.
 
- Nammineq aneerasaartarfiup assiaqutaa alakkarterakku takusinnaavara akunnera angivallaartoq.