Sermersooq: Akiliisinnaajunnaartumik pisineq immikkut iliuuseqarneruvoq

Kommunip sulliffeqarfik akiliisinnaajunnaartoq Viking Greenland pisiarimmagu, immikkut ittumik iliuuseqarnerusoq, Kommuneqarfik Sermersuumi Sanaarfinermut Avatangiisinullu Ingerlatsivimmi pisortaq, Mike Jakob Kristiansen, oqarpoq.

- Tasiilami suliniutit arlaqartut patajaallisarneqarnissaat pillugu suliffeqarfik pisiarineqarpoq, Mike Jakob Kristiansen KNR-imut oqarpoq.

Allaqqunneqarsinnaanngimmat
Suliffeqarfiup akiliisinnaajunnaannginnerani Tasiilami sanaartorneqartut arlaqartut suliffeqarfimmit suliarineqarput. Akiliisinnaajunnaarnerullu kingunerilerpaa, ulluunerani paaqqinnittarfik inissiallu qulit sanaartorneqarnerat naammassineqarsinnaannginnerat. Kommunimiillu allaqqunneqarsinnaanngitsutut isigineqalermat suliffeqarfiup akiliisinnaajunnartup pigisai pisiarineqartariaqarsimapput.

Aamma atuaruk Tasiilami sanaartornermik suliffeqarfik akiliisinnaajunnaarluni matuvoq

- Sanaartukkat unitsikkallarnerat sivisuallaannginniassammat, Immikkut illuinnartumik iliuuseqarpugut, Mike Jakob Kristiansen oqarpoq.

Taassuma erseqqissaatigaa, suliffeqarfik akiliisinnaajunnaartoq suliffeqarfimmit namminersortumit tiguneqarnissaa, kommunimit kissaatiginartinneqaraluartoq.

Kommuni sanaartornermik suliaqartussaanngilaq
Suliffeqarfiup kommunemit tiguneqarnera isumaqanngilaq siunissami Tasiilami sanaartorneq, sanaartukkanillu allanik suliat kommunimit isumagineqartassasut.

- Suliffeqarfiup akiliisinnaajunnaarnerata kingunerisai paasilluarutsigit sanaartukkat kiffartuussinerillu allat suliarineqartut, suliariumannittussarsiuutissavagut Mike Jakob Kristiansen oqarpoq.

Aamma atuaruk Viking Greenlandip akiliisinnaajunnaarnera akileraartartunut akisusinnaavoq

Suliariumannittussaarsiuussinerit qaqugu piumaarnersut kommunemit maanna oqaatigineqarsinnaanngilaq, neriuutigineqarporli suliariumannittussarsiuussinerit siulliit  aappagu maajip imaluunniit junip qaammataani piumaartut. Mike Jakob Kristensenip qulakkeerlugu oqaatigisinnaannginerarpaa, illoqarfinni nunaqarfinnilu taamatut pisoqaqqittoqassagaluarpat kommuni suliffeqarfimmik namminersortumik tigusinissaminut piareersimanersoq.

- Pissutsit qanoq innersut takutikkumaarpaat taamatut pisoqaqqissagaluarpat, Kommuneqarfik Sermersuumi Sanaarfinermut Avatangiisinullu Ingerlatsivimmi pisortaq, Miki Jakob Kristiansen oqarpoq.

Aamma atuaruk Tasiilami akiliisinnaajunnaartoqarnerani Sermersooq suliniuteqalersoq