Serbiamiu qaartartumeerinissamik siorasaaruteqareerluni naapitaqarusukkaluartoq
![](/sites/default/files/styles/image_934x467/public/article_images/20190718-113714-l-1920x1198we.jpg?itok=zjJu6KCF)
Serbiamiu angut asannileqqasoq Serbiap illoqarfiisa pingaarnersaata Beogradip mittarfianut qaartartumeerinissamik oqarasuaatikkut siorasaaruteqarsimasutut imminut nassuerutigivoq.
Angutip tyskit timmisartuutileqatigiiffiani Lufthansami timmisartumi saqisoq Beogradimi naapissimasami asannilerfigisimasamilu naapinnissaa neriuutigalugu taama siorasaaruteqarsimavoq.
Angutip, 65-inik ukiullip timmisartumi saqisoq akunnittarfimmut, unnuiffigisaanut ujaqqaarsimagaluarpaa. Akunnittarfimmili nassaarinngeriaramiuk mittarfimmut sianerluni Lufthansap timmisartuutaani qaartartoqarnerarnissaanik isumassarsivoq. Taamaaliorunimi timmisartumi saqisoq Beogradimit aallanngitsuussasoq, eqqartuussivimmi nassuiaatigaa.
Angutip siorasaaruteqarnerani ilaasussat 130-t timmisartumilu inuttat tallimat timmisartumit qimagussorneqarput, politiillu qaartartulerisartullu timmisartumik misissueqqissaareernissaata tungaanut akunnialuit utaqqisariaqarlutik.
Serbiami asannilersimasoq parnaarussivimmi ulluni 30-ni paarineqarpoq, qaartartoqarneraaninilu pissutigalugu timmisartuussinermut akornusersuinerminik uivertorsuanngortitsinerminillu unnerluutigineqassalluni.