Sequtserineq tillinniarnerlu: Tasiilami meeqqat inuusuttullu sequtserisartut
Videoliuutit atortuit seqummakut, oqarasuaatit tillitat igalaallu seqummakut.
Tassa Tasiilami tillinniarnerit sequtserinerillu ikinnerpaamik 13-it asaanerata kingorna, Tasiilami alivarpimmi Cafe Neriusaamilu nalaanneqartut.
Politiip oqarnera naapertorlugu meeqqat inuusuttullu aqqaneq marluk 20-llu akornanni ukiulli uani pineqarput.
- Sunaasinnaasoq tamaat tiguaat. Videoliuummut atortut aserorsimavaat, akiliinermut karsi, telefoni, imigassat aalakoornartortallillu tillissimavaat. Imigassaateqarpianngikkaluarpugut kisianni ilisimasimavaat peqartugut, Tasiilami Cafe Neriusaamik piginnittoq, Lars Vestergaard oqarpoq.
Taassuma cafeutaa sapaatit akunnerisa tallimat ingerlanerinnaani arfineq pingasoriarluni tillinniarfigitissimalluni oqaatigaa.
Assaat nerisassani
- Suna tamaat aserortersimavaat – matut, parnaarsaatit kalunnerillu. Innaallagiaq qaminneqarsimammat nioqqutissaaterpassuagut annaavagut. Sikut aassimammata eqqaanngaatsiarluta. Nioqqutissaaterpassuagut nerisassat aamma assamminnik attortarsimammatigit eqqarpagut.
Inuusuttut meeqqallu eqimattanngorlutik aasami sulinngiffeqareernermi aserorterillutillu tillinniartartut,Tasiilami politiit kommisæriata Jannick Grayip KNR-imit oqaloqatigineqarami oqaatigaa.
Allaammi meeqqat atuarfiat Tasiilami alivarpi qaammatit marluk ingerlaneranni tallimariarluni aserorteriffigineqarsimasoq, Tasiilami Alivarpimmi pisortaq, Jørn Holbech oqarpoq.
AAMMA ATUARUK Lektori: Nunatsinni ikorfartortissaaleqineq ajornartorsiutaavoq
- Inuusuttuupput meerartaqarlutillu, inuunerminnik siunertassaaleqisut. Sumiginnagaapput, siunnersorneqarnissamillu pisariaqartitsipput.
Ajornartorsiut inunnik isumaginnittoqarfimmit iliuuseqarfigineqartariaqartoq, taanna isumaqarpoq.
- Illoqarfiugaluarpat nunaqarfiugaluarpalluunniit innuttaasut susassaqartullu ataatsimoorlutik perorsaaqataasariaqarput. Taakkunani ataasiinnarluunniit soorlu politiit, isumaginnittoqarfik, angajoqqaat atuarfilluunniit suleqataanngippata ajalusoortoqassaaq. Taamaammat ajornartorsiut qaangerneqassappat Tasiilami innuttaasut ataatsimoortariaqarput.
