Lektori: Nunatsinni ikorfartortissaaleqineq ajornartorsiutaavoq
Danmarkimi immikkut paarisassanngorlugit pineqaatissinneqarsimasut ikorfartorteqarnissaq pisinnaatitaaffigaat. Taakku pineqaatissinneqarsimasut periarfissaannik pisariaqartitaannillu ikorfartuisuupput, toqqissisimanissamut aqqutissiueqataasuullutik.
Nunatsinnili ikorfartortissaaleqineq ajornartosiutaavoq.
AAMMA ATUARUK Lektori: Danmarkimit ilisimasat atorluarsigit
Nooqqaarnermiilli ikorfartorteqarnissaq pingaaruteqartoq Ilisimatusarfimmi Lektori oqarpoq.
- Suut tamarmik maani nutaajutillugit pineqaatissinneqarsimasut ikorfartorteqaraluarpata nakkutilliisunut iluaqutaassagaluarpoq. Ikorfartortit malittarisassat qanoq ittuunerannik taava aamma pineqaatissinneqarneq sooq taama ittuuneranik nassuiaasinnaapput. Pineqaatissinneqarsimasunut taam pineqarneq eqqissiallaatasarami.
Annemette Nyborg Lauritsen oqarpoq.
Herstedvesterimi immikkut paarisassanngorlugit pineqaatissinneqarsimasunut ikorfartortaasut minnerpaamik qaammammut ataasiarlutik pulaartarput. Pineqaatissinneqarsimasullu nammineq aalajangertarpaa pulaartoqarnermi suut eqqartorneqassanersut. Pineqaatissineqarsimasorlu eqqartuussiviliassatilluni kissaatigippagu peqataasinnaasarlutik.
AAMMA ATUARUK Sulisut peqatigiiffiat inissiisarfittaami pissutsinut isumakuloqisoq
- Inissiisarfimmut attuumassuteqanngitsoq takkuttarpoq, ilaquttatut ikinngutaalluartutulluunniit inissisimalluni, taamaakkaluartorli assersuutigalugu eqqartuussivimmi suliat pinneqatissinneqarsimasumut tungasut qaqugu suliarineqassanersut ilisimaareqqinnaartarlugit.
Københavnimi Kalaallit Illuutaanni ikorfartuisunut ataqatigiissaarisoq Susanne Jensen taama oqarpoq.
Nuummi pineqaatissinneqarsimasunik inissiisarfik matoqqasumik immikkoortortaqarfilik ammarmalli isornartorsiuutit imaaginnavipput:
Immikkut paarisassanngorlugit eqqartuussat arfineq-pingasut Herstedvesterimit Nuummut maanna nutsileruttorput. Parnaarussalerisut kattuffiata tamanna isumakulunnartoqartippaa, Nuummimi inissiisarfimmi nakkutilliisut amerlanerit ilinniartuummata.
Nuummi pineqaatissinneqarsimasunut inissiisarfimmi sulisut 49-sussaagaluartuni 36-nnaapput. Taakkunanngalu 21-t suli ilinniartuullutik.
Nunatsinni pineqaatissinneqarsimasunut inissiisarfimmi nakkutilliisussaaleqineq iliuuseqarfiginiarlugu, Danmarkimi naalakkersuisut aappaagumut aningaasanut inatsisissaq suliarilerpassuk, nunatsinnit folketingimut ilaasortat isumaqatiginninniarnissamut piareersimapput. Inissiisarfinnimi nakkutilliisut aningaasarsiakippallaartut taakku isumaqarput.
Immikkut paarisassanngorlugit pineqaatissitat arfineq-pingasut Herstedvesterimiikkunnaarlutik Nuummi inissiisarfittaami matoqqasumiilernissaat, inissiisarfimmi nakkutilliisunit suli ilinniartuusunit allanillu misilittagaqarpianngitsunit paaqqutarineqarnissaat illersorneqarsinnaanngitsoq, Ilisimatusarfimmi lektori isumaqarpoq.
Nunatsinni ataqatigiissaarisoqanngilaq
Nunatsinni pineqaatissinneqarsimasunut ikorfartortaasut lektori naapertorlugu amerlanngillat, taakkulu ilinniartinneqartannginneri taassuma uggornaraa.
- Kisianni sungiusarneqartanngillat, attaveqaateqanngillat, sulileraangamilluunniit qanimut naapinneqarneq ajorput. suliassaq namminneq ilusilersupajaartarpaat. Tamannalu ajornartorsiuterujussuuvoq, ikorfartortinut pineqaatissinneqarsimasullu uggornartuuvoq.
Annemette Nyborg Lauritsen oqarpoq.
Kommunit pineqaatissinneqartut ikorfartuisussanik innersuusisartuupput, taava politimesterip innersuussat piukkunnassusiat nalilerlugit atorfinitsittarpaat.
Pineqaatissinneqarsimasunut Isumaginnittoqarfiup Danmarkimi qullersaqarfianit ajornartorsiut eqqummaariffigineqartoq pisortap oqaatigaa, sulili qanoq iliortoqarnissaanik aaliangiisimanngillat.
- Ajornartorsiutinut eqqummaariffigisatsinnut taanna ilaavoq. Tamanna ulluni tulliuttuni Kalaallit Nunaanukaruma pisortarlu Naaja Nathanielsenilu eqqartugassatta ilagaat, Thorkild Fogde oqarpoq.
