Sulisut peqatigiiffiat inissiisarfittaami pissutsinut isumakuloqisoq
Paarnaarussivinni paarsisut Danmarkimi kattuffiata siulittaasuata Nuummi inissiisarfittaaq pulaarlugu takusani naammagisimaanngilluinarpai.
- Inussiarnersorpassuanik naapitaqarpunga. Taamanneratali pissutsinut takusannut isumakulunnera minnerulersinngilaa, minnerunngitsumik inatsit nutaaq peqqutigalugu inissinneqarsimasut ulorianartorujussuit ilaat Kalaallit Nunaannut utetinneqakaalertussanngomata, Paarnaarussivinni paarsisut Danmarkimi kattuffiata siulittaasua Bo Yde Sørensen oqarpoq.
Herstedvesterimi immikkut paarisassanngorlugit eqqartuussat
* Herstedvesterimi immikkut paarisassanngorlugit eqqartuussat arfineq pingasut Nuummi inissiisarfittaamut ulluni makkunani nutsileruttorput.
* Kalaaleq Herstedvesterimi immikkut paarisassanngorlugit eqqartuussaq Nuummi pineqaatissinneqarsimasunut inissiisarfittaamut nuukkumalluni qaqugukklluunniit qinnuteqarsinnaavoq.
* Kalaallit pineqaatissinneqarsimasut katillugit 29-it Herstedvesterimi inissinneqarsimapput, arfineq pingasut nuuttut taakkununnga ilaapput.
Taassuma oqarnera naapertorlugu marlunnik angisuunik ajornartorsiuteqarpoq. Siullermik sulisut naammanngillat, aappaattullu sulisut amerlanersaat misilittagakittuararsuupput.
Pinerlussimasunik isumaginnittoqarfik KNR-imut ilisimatitsivoq, inissiisarfinni nakkutilliisunik 36-nik maanna sulisoqarlutik. Nakkutilliisunit 36-nit 21-it ilinniartuupput.
Nakkutilliisut taama amerlatigisut ilinniartuunerat, sulisut peqatigiiffiata siulittasuata oqarnera naapertorlugu ajornartorsiutaavoq angisooq:
- Ingammik paarnaarussat ulorianartorjussuit Danmarkimiit maanga nuuttussanngortillugit. Tamatumani aalajangiisuulluinnassaaq, inoqarnissaa paarnaarussanut saangiullutik oqarsinnaasunik, "ajornartorsiununa ima aaqqittussaagipput, Bo Yde Sørensen oqarpoq.
Pinerluuteqarsimasunik isumaginninnermi pisortap, Naaja Nathanielsenip, sulisut taama amrlatigisut ilinniartuunerisa ajornartorsiutaaneragaanera isumaqatigaa:
- Sulisut ilarpasssuisa ilinniartuunera Nuummi unammillernartuutipparput. Ilaat naammassilerput, allat ilinnialerlaajupput. ataatsimulli isigalugu oqarsinaavugut, sulisut ilaat taama amerlatigisut ilinniartuunerat ajornartosiutaavoq.
AAMMA ATUARUK Sulisussaaleqineq: Inissiisarfittaassami paarsisut qulit amigaatigineqartut
Pisortarlisuli isumaqarpoq, inissiisarfiit isumannaassusaat naammattoq:
- Isumannaatsuussuseq nalilersortuarparput. Tamanna peqqutigalugu aamma sulisut immikkortoqarfinnut ikinnerusunut katersorpagut immikkoortoqarfinnillu matusilluta. Immikkoortoqarfik ataaseq isumannaatsuussappat qassinik sulisoqartariaqarnersoq, piginnaasallu naammattut tassaniinnissaq qulakkeerniarlugu nalilersuiuarpugut.
Pinerlussimasunik isummaginnittoqarfiup immikkoortoqarfiit ilaat matoqqatinnissaat aaqqiissutissatut siornatigut nalunaarutigereerpaa. paarnaarussivinnili paarsisut peqatigiiffiata siulittaasua tamatuminnga eqqissiiminngilaq:
- Naamik, taamaanngilanga. Oqarluaannaraani eqqissisitsiniutaannaavoq. Ajornartorsiut sivisuumik mikinerarneqarpoq, kisiammi taamaammat maanna angisoorsuanngorpoq, iluarsifissaa takujumilaalluni, Bo Yde Sørensen oqarpoq.
