Lektori: Danmarkimit ilisimasat atorluarsigit
Naammattunik nakkutilliisussaqannginneq pissutigalugu Herstedvesterimiittut Nuummi inissiisarfiup immikkoortortaanut matoqqasumut nuuttut nakkutilliisunit suli ilinniartuusunit allanillu misilittagaqarpianngitsunik paarineqartussaapput. Taamaattoqarneralu illersorneqarsinnaanngitsoq, Ilisimatusarfimmi lektori Annemette Nyborg Lauritsen oqarpoq.
- Nakkutilliisut Herstedvesterimut ilinniariartinneqarsimasinnaagaluartut isumaqarpunga, aamma nakkutilliisut illersornissaat eqqarsaatigalugu. Taamaalillutik sullitassamik qanoq ittuuneri paasissagaluarpaat, immaqalu ilisarisimalaalersimassagaluarlugit, taamatullu Herstedvesterimi sulisut sanileralugit ilinniartinneqarsinnaallutik, Annemette Nyborg Lauritsen oqarpoq.
AAMMA ATUARUK Sulisut peqatigiiffiat inissiisarfittaami pissutsinut isumakuloqisoq
Nakkutilliisut 21-t ilinniartuusut
Nuummi pineqaatissinneqarsimasunut inissiisarfimmi sulisut 49-sussaagaluartuni 36-nnaapput. Taakkunanngalu 21-t suli ilinniakkaminnik naammassinngillat.
* Herstedvesterimi immikkut paarisassanngorlugit eqqartuussat arfineq pingasut Nuummi inissiisarfittaamut ulluni makkunani nutsileruttorput.
* Kalaaleq Herstedvesterimi immikkut paarisassanngorlugit eqqartuussaq Nuummi pineqaatissinneqarsimasunut inissiisarfittaamut nuukkumalluni qaqugukklluunniit qinnuteqarsinnaavoq.
* Kalaallit pineqaatissinneqarsimasut katillugit 29-it Herstedvesterimi inissinneqarsimapput, arfineq pingasut nuuttut taakkununnga ilaapput.
Herstedvesterimi nakkutilliisut kalaallinut immikkut pineqaatissinneqarsimasunut sullissinermut misilittagaqarluartut nunatsinnukarlutik Nuummi nakkutilliisunut suleriutsiminnik ilinniartitsisinnaasut ilisimatuup siunnersuutigaa.
- Herstedvesterimi paarnaarussanik ilisarinnilluartut piffissap ilaani Kalaallit Nunaanni nakkutilliisunut ilisimasaminnik ingerlatitseqqissinnaanerat periarfissaasinnaavoq, Annemette Nyborg Lauritsen oqarpoq.
Qinnuteqartut amerlanerunissaat neriuutigineqaraluartoq
Pineqaatissinneqarsimasunut inissiisarfiup nutaap sananeqaqqaalerneranniilli ajornartorsiut pioreerpoq, pineqaatissinneqarsimasunummi nakkutilliisut ukiorpassuanngortuni amigaatigineqartuarput.
Sulisunik naammattunik piffissaqarluarnerminni atorfinitsitsiniarsimanatik Danmarkimi Pineqaatissinneqarsimasunut isumaginnittoqarfimmi pisortap nassuerutigaa.
- Sulisunik naammattunik atorfinitsitsiniarneq ilimagisatsinnit ajornarnerusimavoq. Atorfinnut inuttassarsiuussatsinnut qinnuteqartoqarluarnissaa neriuutigisimagaluarparput, taamalu amerlatigisut suliffimminnit soraarniuteqarnissaat naatsorsuutigisimanngikkaluarlugu. Kalaallit Nunaannili ingerlalluartoqarmat, suliffiusinnaasunillu pitsaanernik peqarmat uagutsinnut unammillernartuuvoq, Thorkild Fogde oqarpoq.
AAMMA ATUARUK Aki-Matilda Aajalu pineqaatissinneqarsimasut nakkutilliisuisa aningaasarsiaat qaffanniarpaat
Taamaammat nakkutilliisussaaleqisoqarnera iliuuseqarfiginiarlugu qallunaanik nunatsinnukartitsisoqarsinnaanera misissorumaarlugu KNR-imut oqarpoq.
- Ikittunnguakkuutaarlugut nuutsittassavagut. Nussornerilu ilutigalugu sulisunik Danmarkimiit, soorlu Herstedvesterimit, sivisunngitsumi Kalaallit Nunaannukartitsigallartassanerluta eqqarsaasersuutigaarput, kalaallit pineqaatissinneqarsimasunut nakkutilliisunut ikiuiartortussanik, Torkild Fogde oqarpoq.
Herstedvesterimit nunatsinnut nuuttut maannamut sisamaapput.
