Aki-Matilda Aajalu pineqaatissinneqarsimasut nakkutilliisuisa aningaasarsiaat qaffanniarpaat
- Uani pingaaruteqarpoq danskit ministerit toqqaannaq oqaloqatiginissaat. Sukumiisumillu iliuuseqarnissamut aningaasaqarnermut inatsimmut aamma qaqinnissaa, Siumumit Folketingimi ilaasortaq Aki-Matilda Høegh-Dam taama oqarpoq.
Immikkut paarisassanngorlugit eqqartuussat arfineq-pingasut Herstedvesterimit Nuummut maanna nutsileruttorput. Parnaarussalerisut kattuffiata tamanna isumakulunnartoqartippaa, Nuummimi inissiisarfimmi nakkutilliisut amerlanerit ilinniartuummata. Taamatullu ingerlaannartoqarsinnaanngitsoq Inuit Ataqatigiit Folketingimi ilaasortaatitaat isumaqarpoq.
AAMMA ATUARUK Parnaarussalerisut kattuffiat ministerimut saaffiginninniarpoq
- Amerlasuut atorfiminnit soraarsimanerat unammillernartuuvoq. Ilinniartunik atorfinitsitsisariaqartoqartarpoq, taamatullu ingerlaannartoqarsinnaanngilaq, Inuit Ataqatigiinnit Folketingimi ilaasartoq Aaja Chemnitz Larsen oqarpoq.
Danmarkimi naalakkersuisut inatsiseqarnermut akisussaaffimmik tigusinerusariaqartut Aki-Matilda Høegh-Dam isumaqarpoq, maannami taamaattoqanngitsoq taanna oqarpoq.
- Aningaasanut inatsisissamut isumaqatiginninniarnerit massakkut aallartiliivimmata taanna pingaarnerit ilaattut inississavara, Aki-Matilda Høegh-Dam oqarpoq.
Immikkut isumaqatiginninniartoqassaaq
Aningaasanut aappaagumut inatsisissamut immikkut isumaqatiginninniassalluni Aaja Chemnitz Larsen oqarpoq.
- Taamaammat iliuuserisinnaasat allat maanna misissorpavut, soorlu assersuutigalugu immikkut ittumik otte millioninik illikartitsisoqarsinnaanera. Inissiisarfimmut nakkutilliisussarsiornermut sulisooreersullu atorfeqartiinnarniarneranni qaavatigut tapiliussanik aningaasarsiassaatut, Aaja Chemnitz Larsen oqarpoq.
2020-mut aningaasanut inatsisissatut siunnersuut qallunaat naalakkersuisuinit augustip 27-ani saqqummiunneqarpoq, Folketingimilu ilaasortanit decembarip tungaanut suliarineqassalluni.