Seqernup pulanera Amerika Avannarlermi ualeru takuneqarsinnaassasoq
![](/sites/default/files/styles/image_934x467/public/2024-04/48186569901_4b2dd9ca8e_b.jpg?itok=FOCC7dnG)
Seqernup pulanera Amerika Avannarlermi ullumi ataasinngornermi takuneqarsinnaassaaq.
Amerikamiut avataarsualiartitsisarfiat NASA nittartakkamini taama allaaserisaqarpoq.
Seqernup pulanera Mexicomi, USA-mi Canadamilu takuneqarsinnaassaaq. Seqernup tamakkiisumik pulanera USA-mi naalagaaffimmi Texasimi aallartissaaq, USA-milu naalagaaffinni 13-ini kingorna taava takuneqarsinnaassaaq, Canadallu kangimut kujasissuani kingorna aamma takuneqarsinnaassalluni.
Seqineq, Qaammat Nunarsuarlu uiguleriiaallutik inissisimagaangata seqineq pulasarpoq, Qaammat seqineq tamakkiisumik assersimasarlugu nunarsuullu ilaa alanngumiilersarluni.
Seqernup tamakkiisumik pulasarnera qaqutigoorpoq. USA-mi kingullermik taama pisoqarmat 2017-imi pivoq, taassumalu siorna 1979-imi pulalluni.
Canadami Niagarap nalaani takornarniarpassuaqarnissaa piareersimaffigineqarpoq.
Inuit 1 millioninit amerlanerusut seqernup pulanera takuniarlugu ornigunnissaat ilimagineqarpoq. Nutaarsiassaqartitsivik Reuters taama allaaserisaqarpoq.
Niagara takornarnianit 14 millionit missaannit ukiumut nalinginnaasumik tikinneqartarpoq.
Takornarnianit ornigarneqarluartartut arlallit tamaani oqartussanit matoqqatinneqarput, aqquserngit angallaffiuallaannginnissaat siunertaalluni. Tamaanilu atuarfiit amerlanerit aamma matoqqajumaartut nutaarsiassaqartitsiviup Niagara This Weekip allaaseraa.
Seqineq tamakkiisumik USA-mi ukioq 2044-mi aggustimi tulliani pulassaaq.