Seqerngup pulanerata ilaa Nuummi unnugu takuneqarsinnaassasoq

Amerika Avannarlerup ilarujussuani seqerngup pulanera tamakkiisumik unnummut takuneqarsinnaassaaq.

Seqineq, qaammat nunarsuarlu uiguleriiaallutik inissisimagaangata qaammatillu seqinerup qaamanera tamakkiisumik assersimagaangagu seqineq pulasarpoq.

Nunatsinni tamanna aamma takuneqarsinnaalaassaaq. Seqerngulli 40 procentiata missaannaa asserneqassaaq.

Amerikamiut Nuummi sinniisoqarfiat Facebookimi quppernermini allappoq.

Seqinerup pulanera 17.39 aallartissaaq akunnerillu marlungajaat sivisussuseqarnerani nalunaaqutaq 18.34 taarnerpaaffissaminiissalluni.

Nasap seqengup pulanera nammineq isiminnik takunnikkiartorsinnaanngitsunut toqqaannartumik aallakaatissavaa. Aallakaatitsinerat nunatta nalunaaqutaa naapertorlugu 16.00 allartissaaq nalunaaqutarlu 19.00-ip tungaanut aallakaatinneqassalluni.

Seqernup tamakkiisumik pulasarnera qaqutigoorpoq. USA-mi kingullermik 2017-imi tamakkiisumik pulavoq, taassumalu siorna 1979-imi pulalluni.

Qaqutigoortumik pulanera isiginnaarniarukku isinnut illersuuteqarnissat pingaaruteqarpoq. Seqinermi naak tarringalaaraluartoq qaamanera suli sakkortusinnaavoq isinullu ajoqusiisinnaalluni.

Taamaammat seqerngup pulaneranik isiginnissinnaanissamut atorneqartussanik seqerngullu qinngornerata annerpaartaanut matussusiisunik isaruaqarnissaq pitsaasuuvoq.

Seqinersiutit nalinginnaasut seqerup qaamanerata annertuallaarnera pissutigalugu naammanngillat.