Seahawkimi timmisartortartup qulimiguulinni nutaani sillimaniarneq toqqissisimanartikkaa

Qulimiguulinni Seahawkini sillimaniarneq isornartorsiorneqaraluartoq kommandørkaptajnip Mogens S. Christensip qularutissaqartinngilaa:

- Siusinnerusukkut pigisatsinnit atortorissaarnerupput. Atortorissaarnerungaatsiarput, kommandørkaptajn oqarpoq.

Mogens S. Christens umiarsuarmi alapernaarsuummi Hvidbjørnenimi qulimiguullip ataatsip angerlarsimaffissaani naalagaavoq.

AAMMA ATUARUK Qulimiguullit Issittumi atorneqartussat sekundialunnguit ingerlanerinnaani kivisinnaapput

- Nunarsuatsinni Seahawkinik ulikkaarpoq, ajutoortaqattaartarnerannullu takussutissaqanngilaq. Ajutoortoqarsinnaanerali pisinnaavoq, taamaammat taamaattoqaratarsinnaaneranut sungiusarsimasunik ilaasoqarnissaa pingaaginnarpoq, kommandørkaptajn oqarpoq.

Seahawk puttasinnaanngitsoq

Qulimiguullip nutaap LYNXimut sanilliullugu amigaatigisaa isornartorsiorneqarsimasorlu qulimiguulimmi aqutsisup, Mogens Sønderhøjip nassuiaatigaa.

- Imaanut mikkaanni balloniusat puttatitsisinnaasut amigaataapput, Mogens Sønderhøj oqarpoq.

Seahawkip puttanissaanut atortorissaarutit amigaataanerat pissutigalugu qulimiguulimmi aquttup inuunini iluatigalugu taakkunani timmisartorusunnani Jyllands Postenimut siusinnerusukkut oqaatigaa.

- Uaguttaaq pilotitut issimasutullu aamma ernumatigisimavarput. Sooruna taamaattoqanngitsugut. Puttasinnaassuseqarnerannimi imaanut nakkaraluarutta umiarsuarmut aallertumut pisuinnarluta ikaarsinnaavugut. Taamaaliorsinnaajunnaarpugulli, Mogens Sønderhøj maannamut Seahawkini akunnerni 400-ni timmisartoreersimasoq oqarpoq.

AAMMA ATUARUK James Bondip qulimiguuliata alakkarnera

Aqutsisulli puttasinnaannginnerata ernumaginera oqaatigisimagaluarlugu qulimiguullit nutaat sillimaniarnikkut ajunngilluinnartuusut erseqqissaatigaa.

- Silaannarmi angallatiginissaa toqqissisimanartinngikkaluarukku qulimiguulimmi tassani timmisartortartuunanga allami timmisartortartuussagaluarpunga, aqutsisoq oqarpoq.

Ilaasut ikioqatigiissasut

Qumiguulik imaanut mittariaqalissagaluarpat ilaasut sulisullu qulimiguullip kivinnginnerani ikioqatigiinnissaat apeqqutaaginnarpoq. Timmisartortartullu taamaaliorsinnaalluassasorai.

- Qulimiguullit uku silaannaqartorujussuupput, taamaammat imaaliallaannaq kivinavianngillat. Immami kaajallaqqaarnissaa qularutiginngilara, tassanngaanniillu sekundini qulini immap naqqanut kivinavianngilaq, Mogens Sønderhøj oqarpoq.

Kommandørkaptajnip Mogens S. Christensip Seahawkit imaanut mittarnermut atatillugu timmisartunit allanit ilaasartaatinillu allaanerungaanngitsut erseqqissaatigaa.

Ilaasunut sillimaniarnermut ingerlatseriaaseq allanngunngitsoq, qulimiguulillu imaanut mittariaqassagaluarpat inuttat tamatumunnga sungiusarluarsimareersut, aqutsisup, Mogens Sønderhøjip oqaatigaa.

- Ilaasugut amerlanerpaat, tassa nakorsaq, annaassiniartoq allallu aqqarnissamut sungiusarsimasuupput. Ilaasartugut tamarmik sungiusarsimasarput aamma LYNX-ini ukuani aamma taamaaliussaagut, Mogens Sønderhøj oqarpoq.

AAMMA ATUARUK Seahawk Atlantikup avannaani atorneqalersoq