James Bondip qulimiguuliata alakkarnera
Qulimiguullit Seahawkit nutaat qulingiluat pisiarineqartut ataatsimut 4 milliardit koruuneqarput saniatigullu ukiuni 30-ni aservallatsaaliornissaanut 9 milliardit koruunit atorneqassapput.
KNR qulimiguullip timminngikkaangami angerlarsimaffigisaanut alapernaarsuummut Hvidbjørnenimut qaaqquneqarpoq.
Takornariarneq Nuummi talittarfimmi aallartippoq, tusagassiortullu pujortuaqqamik alapernaarsuummut Hvidbjørnenimut ikaarunneqarput.
- Tikilluaritsi, taamaalilluni qulimiguulik qanimut takusinnaavarsi, kommandørkaptajn, Mogens S. Christens naleqanngitsumik takutitsisoq oqarpoq.
Qulimiguulik alutornavippoq. 20 meterisut takitigaaq, 5 meterinillu portussuseqarluni 10 tonsimik oqimaassuseqarpoq.
Ujaasinermut pitsaanerusoq
Qulimiguulik Illersornissaqarfiup ilaatigut imaatigut nakkutiginninneranni, namminersortuunermik ersersitsinermik, aalisarnermik nakkutiginninnermi assartuinermi suliani minnerunngitsumillu ujaasinermi annaassiniarnermilu tapertaassaaq.
Illersornissaqarfiullu qulimiguulittaavani atortorissaaruteqaaluttut Mogens S. Christensip oqaatigaa, atortorissaarutillu maani nunatsinni atorneqartussat erseqqissaatigalugit.
- Taamaammat James Bonditaqalaartoq oqaatigineqarsinnaavoq. Atortorissaarutit filmimi takusarsimasagut ilaat pigaagut, oqarpoq Issittumilu atortorissaarut immikkut pingaaruteqalersinnaasoq erseqqissaatigalugu:
- Avatangiisini kissassutsit assigiinngissusaat takusinnaavaat taamaammat inuit umiarsuilluunniit ujakkatta takuniarnerat ajornannginnerujussuussaaq.
Ferrariunngitsoq
Mogens Søndergaard Seahawkimi pilotit ilagaat. Taanna qulimiguullit nutaat affaata missaani oqimaassusilinni qulimiguulinni LYNX-ini aamma pilotiusimavoq.
Piloti kommadørkaptajnisulli qulimiguullit nutaat alutorsaatigingaatsiarpai, taamaakkaluartorli Seahawkit takutikkamigit qulimiguulitoqqanut LYNX-inut nuannarinninnera takuneqarsinnaavoq.
- Ferrarimik biileqaraanni aqullugu nuannissaaq. Sukkavoq ingerlarillunilu. Qulimiguulik LYNX aamma taamaappoq. Una oqimaannerulaarpoq. Taanna amerikamiut truckianik taaniarpara. Taamaakkaluartorli aamma ingerlalluartarpoq. Sulissutigineqarsinnaavoq, Ferrariunngilarli, Mogens Søndergaard oqarpoq.
