Qulimiguullit Issittumi atorneqartussat sekundialunnguit ingerlanerinnaani kivisinnaapput
Qulimiguullit puttasinnaanissamut atortorissaarutilersorneqannginneri tamatumunnga peqqutaasoq, danskit aviisiat Jyllands-Posten allaaserisaqarpoq.
Illersornissaqarfik Atlantikup Avannaani atorneqartussanik qulimiguulinnik Seahawkimik taaneqartartunik qulingiluanik pisisimavoq, maanilu sila imaannaaneq ajorpoq, ukiummi annersaani issittaqaaq, taartarluni, anorersuartarluni ukiorlu kaajallallugu imaq nillertarpoq.
Jyllands-Postenip timmisartortartoq Mads Bjerre Nielsen oqaloqatigisimavaa, taassuma Illersornissaqarfiup qulimiguulittaavani timmisartornissani naaggaarluinnarpaa.
- Uanga Seahawkinik timmisartorusunngilanga. Inuunera ilaquttakkalu erligivallaarpakka, Mads Bjerre Nielsen oqarpoq.
Issittumi Sakkutooqarfiup qulimiguullit Nunatsinni atorneqalernissaat KNR-imut emailikkut uppernarsarpaa, qaqugorpiarli tamanna pissanersoq oqaatigisinnaanngilaa.
Jyllands-Posten naapertorlugu puttasinnaanissamut amigaatinut taarsiullugu ajunaalernermi aniffissat ataatsimik ilaneqarsimapput qulimiguulillu silataanni annanniummik ikkussisoqarsimalluni.
Qulimiguullip isumannaallisaanermut qaffasissusaa akuersaarneqarsinnaasoq, Illersornissaqarfimmiup atortussanik pissarsiniartarfianeersup orlogskaptajn Claus Buurip Jyllands-Postenimut oqaatigaa.
