Seahawk Atlantikup avannaani atorneqalersoq

Qulimiguulik siulleq nutaaliaalluinnartut ilaat Seahawk Savalimmiuni, Nunatsinnilu atorneqartussaq sisamanngornermi atoqqaarfissiorneqarpoq.
Allattoq Anton Gundersen Lihn
decembarip 15-at 2017 10:10
Nutserisoq Erna Lynge

 

Qulimiguulik umiarsuarmi alapernaarsuummi Hvidbjørnenimi persuarsiutigineqartumik atoqqaarfissiorneqarpoq

Taamaalilluni qulimiguulik siulleq Seahawk savalimmiut nunattalu imartaani suliaqarnermi atorneqartalissaaq.

Illersornissaqarfiup nittartagaanni tamanna allaaserineqarpoq.

Seahawk mattunerullunilu attartuneruvoq.

- Qulimiguulik nutaaliaalluinnartut ilagivaat tamannalu nuannaarutigaarput, umiarsuarmi alapernaarsuummi Hvidbjørnenimi pisortaq, kommandørkaptajn Niels Markussen oqarpoq.

Qulimiguullip nutaaliaalluinnartup puttasinnaannginnera pillugu KNR-ip siorna allaaseraa.

Qulimiguullit Issittumi atorneqartussat sekundialunnguit ingerlanerinnaani kivisinnaasartut qulimiguulinnik nioqqutissiortoq, 2016-imi decembarip 13-ani oqarpoq.

Illersornissaqarfiup qulimiguulittaavi, Issittumi atorneqartussat, ajornartoornermi imaanut nunnittariaqassagunik, sekundit qulit iluanni kivisinnaasut, qulimiguulinnik nioqqutissiortup Lockheed Martinip nalunaarutigaa.  
    
Qulimiguullit puttasinnaanissamut atortorissaarutilersorneqannginneri tamatumunnga peqqutaasoq, danskit aviisiat Jyllands-Posten allaaserisaqarpoq.

Jyllands-Posten naapertorlugu puttasinnaanissamut amigaatinut taarsiullugu ajunaalernermi aniffissat ataatsimik ilaneqarsimapput qulimiguulillu silataanni annanniummik ikkussisoqarsimalluni.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk