Saviminilerinermik ilinniarfik Sisimiunut nuunniarpaat

Nunatsinni teknikikkikkut ilinniagaqarfiit eqqarsaatigalugit, Sisimiut Nunatsinni inissisimanera nalimmassaavigineqartuartariaqarpoq. Tamanna pissaaq, soorlu Saviminilerinermik Ilinniarfiup, maanna Nuummi inissisimasup, Sisimiunut nuunneqarneratigut, Sanaartornermik Ilinniarfimmik, Aatsitassanut Ilinniarfimmik, minnerunngitsumillu Artekimik suleqateqarnermi ilanngutissammat.
Allattoq Carla Davidsen
januaarip 17-at 2013 07:55

Ilinniartitaanermut Naalakkersuisup, Palle Christiansenip, aamma Qeqqata Kommuniani borgmesterip, Hermann Berthelsenip, ataatsimoorlutik tusagassiuutinut ippassaq nalunaarutaanni tamanna erserpoq.

Palle Christiansenip oqarnera naapertorlugu, Savimilerinermik Ilinniarfiup Sisimiunut nuunneqarnissaanut suliamik nangitsisussanik suleqatigiissitaliornissamut Naalakkersuisut piareersimapput.

- Uanga nammineerlunga isumaqarpunga teknikkikkut piginnaasat ineriartortittuarnissaannut Nunatsinni periarfissaqarluartugut, Palle Christiansen oqarpoq, Danmarks Tekniske Universitetimi Artek aqqutigalugu suleqateqarnertik tikkuarlugu.

Namminersorlutik Oqartussat taama nalunaaruteqarnerat borgmesterip Hermann Berthelsenip ilimagineqareersutut nuannaarutigeqaa.

- Teknikkikkut Ilinniarfiup - Tech Collegep - tamatumunngalu ilanngullugu Aatsitassanut Ilinniarfiup - aamma ineriartortittuarneqarnissaat eqqarsaatigalugu, assersuutigalugu  Uummannami immikkoortortaqarfiliortoqarniarnera Aatsitassanut Ilinniarfiup ineriartortinneqarneranut sunniuteqarnavianngitsoq paasinarsereerpoq, aamma maani suliffissaaleqisut suliffissanut nutaanut piginnaanngorsartinneqartuarnissaat eqqarsaatigalugu, Hermann Berthelsen oqarpoq.