Ministeri: Savalimmiut nunanut allanut politikkikkut pissaaneqarnerulerlik

Savalimmiut nunanut allanut politikkikkut piginnaatinneqarnerusinnaallutillu piginnaaneqarnerusariaqarput, Savalimmiuni nunanut allanut ministeri, Poul Michelsen, taama isumaqarpoq.
Assi © : © 2016 Føroya landsstýri
juunip 12-at 2017 14:12
Nutserisoq Simon Uldum -

Aviisimi Jyllands-Postenimi allaatigisaqarluni ministeriuneq Lars Løkke Rasmussen isornartorsiorpaa. Nunatta Savalimmiullu nunanut allanut politikkikkut namminneq aalajangiinissamut pisinnaatitaanerat inatsimmi tunngaviusumi killilerneqartoq ministeriunerup maajimi erseqqissaatigaa.

Tamannali eqqunngilaq, Michelsen taama isumaqarpoq.

Inatsimmi tunngaviusoq assigiinngitsunik nassuiarneqarsinnaavoq, aamma Kunngeqarfiup ilaani namminerisamik nunanut allanut politikkeqartoqarsinnaannginneranik inatsit tigussaasunik oqaasertaqanngilaq.

- Danskit naalakkersuisuisa inatsit tunngaviusoq sakkuliullugu Savalimmiut nunanut allanut politikkikkut piginnaatinneqarnerulernissaannut suleqataasinnaapput. Naalakkersuisulli taamaaliorumanngillat, Poul Michelsen taama allappoq.

Taanna isumaqarpoq Savalimmiuni pissaanerup agguataarneqarnissaa politikerit Københavnimiittut isumaqatiginngikkaangamikku inatsit tunngaviusoq 'patsisipalaatut' atortaraat.

Danmark, Nunarput Savalimmiullu nunani tamalaani politikkikkut ullumikkut ataatsimoortarput. Taamatulli aaqqissuussineq ajornartorsiutinik pilersitsisarsimavoq, pingaartumik aalisarnerup iluani, nunat soqutigisaat arlaleriarlutik assigiinngitsuusarsimammata.

Lars Løkke Rasmussenip aaqqissuussineq misissussallugu piareersimaffigalugu qanittukkut oqaatigaa - Savalimmiulli Nunattalu nunanut allanut politikkikkut namminneq aalajangiinissamut pisinnaatitaanerat inatsimmi tunngaviusumi killilerneqartoq oqaatigalugu.

Danskit nunanut allanut ministeriata Anders Samuelsenip Savalimmiut marlunngornermi tikeraassavai, Savalimmiullu nunanut allanut ministeriat Poul Michelsen aamma ataatsimeeqatigissavaa.