Savalimmiut killilersuutinik tamanik atuiunnaassasoq innersuussutigineqarpoq

Savalimmiuni tuniluunneq sakkortunerpaaffimminiippoq. Taamaakkaluartorli Savalimmiuni naalakkersuisut maanna innersuussipput kingusinnerpaamik februaarip 28-aniit killilersuutit tamarmik atorunnaassasut.

Taamaalillunilu Savalimmiuni najugaqartut marsip aallaqqaataaniit ulluinnaat nalinginnaasut atuleqqeriaannaavaat.

Taamaaliorneq isumatusaarneruvoq, Savalimmiuni nutaarsiassaqartitsivimmi Kringvarpimi aaqqissuisoq Uni Leitisstein Hansen naliliivoq.

- Tuniluuttoqartorujussuugaluartoq Savalimmiuni napparsimaviit artukkerneqanngillat, siornatigut misilittakkatsinniit allaanerusumik. Imaappoq tuniluunneq aqunneqarsinnaajunnaaraluartoq inuit pinartorsiorlutik napparsimalinngillat, taanna oqarpoq.

Jannuaarimi tuniluunnermut kisitsisit assut qaffapput, decembarimi ullormut 100-t tunillanneqartarput, jannuaarimili ullormut tunillanneqartartut 727-nngorsimapput.

 korona.fo. naapertorlugu Savalimmiuni covid-19-mik toqquteqartut katillugit 17-iupput.

Arlallit annilaangapput

Savalimmiuni killilersuisoqarunnaassaaq. Uni Leitisstein Hansen naapertorlugu inuit amerlanerpaamik 100-t taamaallaat katersuussinnaatitaanissaat maannakkut innersuussutigineqarpoq. Inissaqassappalli suli amerlanerusinnaallutik. Savalimmiunilu naalakkersuisut innersuussutigaat, februaarip aallaqqataani neriniartarfiit imerniartarfiillu ammarneqassanngikkallartut, taamaallaalli Torshavnimi ammaqqissinnaassallutik.

AAMMA ATUARUK Coronavirus Savalimmiuni tuniluutipiloortoq: 500-t tunillanneqarsimasut

Savalimmiuni innuttaasut 93 procentingajai aqqaneq-marluleereersimasuni akiuussusertissimapput, 91 procentii marloriarlutik akiuussusertissimallutik, 48 procentiilu 18-it sinnerlugit ukiulinni pingajussaanik akiuussusertissimallutik. 

Killilersuisoqarunnaarnissaanik innersuussisoqarnera pillugu innuttaasut qanoq qisuariarpat?

- Inuit assigiinngitsumik qisuariarput. Soorunami annilaangasoqarpoq, ataatsimulli isigalugu coronap ukiut tamaasa takkuttuartussaanera inuit paasivaat, inooqatiginissaalu ilinniartariaqarparput toqqorterfiginiaannarnagu, Uni Leitisstein Hansen oqarpoq.

Ammaakkiartuaarneq pingasoqiusamik avinneqassaaq

Ammaassinissamut periusissatut innersuussineq atulissappat pingasutut avinneqassaaq. Februuarip aallaqqaataani imerniartarfiit neriniartarfiillu ammarneqassapput.

Weekendtimi aallartimisaarissallutik, februuarip 15-iani suli ammarnerulaaqqissapput, februaarillu 28-ani tamakkiisumik killilersuisoqarunaavissaaq, taanna oqarpoq.

Soorunami pissutsit allanngorsinnaapput - ukiummi marluk ingerlaneranni tamanna arlaleriarluni aamma pisareerpoq.

Napparsimaveqarfilli oqassagaluarpat artukkerneqalerlutik, isumaqarpunga mattussinermut uteqqittoqapallassasoq, Uni Leitisstein Hansen KNR-mut oqarpoq.

Savalimmiut nuna anginngilaq, inuit eqqissillutik pipput, neriuutigalugulu ajornavianngitsoq. Siunertaavormi tamarmik ataatsikkut tunillanneqannginnissaat.

Uni Leitisstein Hansen naapertorlugu, Savalimmiuni politikerit innersuussinermut tunngatillugu isumaqatigiissimaqaat. 

Taamaallaat isumaqatigiinngissutigivaat testertinnerup annertussusaa. Misissorteqattaartoqartassava? imaluunniit annikillisissava? tassami misissortinnermut periuseq Savalimmiut aningaasaqarneranut akisusimaqaaq.

- Eqqaamassavarput, akiuussusertissimasut amerlaqimmata, tamannarpiaavorlu siunissap ajunngitsumik ingerlanissaanut aalajangiisuunerpaaq, naak aamma tuniluunneq annertugaluaqisoq, taamaattorli neriulluarpugut, Uni Leitisstein Hansen oqarpoq.