Coronavirus Savalimmiuni tuniluutipiloortoq: 500-t tunillanneqarsimasut

Savalimmiuni tunillatsittut amerliartupiloorput.

Savalimmiuni oqartussat coronavirusip tuniluutilinnginnissaa pillugu aamma suliniuteqarput. Coronavirusimi sapaatit-akunnerata naanerani aatsaat taama tuniluutsigaaq, Savalimmiunilu tunillanneqarsimasut maanna katillutik 500-uullutik.

Savalimmiuni tusagassiorfimmi Kringvarp Føroyami tusagassiortoq aaqqissuisorlu Uni Leitisstein Hansen KNR-imut taama oqaluttuarpoq:

- Napparsimmavimmi uninngasut maanna arfiniliupput, inuillu 500-t missaat maanna tunillanneqarsimasuullutik. Inuit 68-it nutaat tunilanneqarsimasut ippassaq paasineqarpoq, eqqorneqangaatsiarpugut, neriuppugulli anigorumaaripput. Inuit angerlarsimaannarnerulersut maluginiarparput, sammisassaqartitsiniarnernilu peqataasut ikinnerulersut, aaqqissukkallu amerlasuut taamaatiinnarnearput. Pissanganassaaq qanoq pisoqarumaarnersoq, Uni Leitisstein Hansen KNR-imut oqarpoq.

AAMMA ATUARUK Savalimmiuni aatsaat taama amerlatigisut tunillatsittut

Inuit 99-it tunillanneqarsimasut Savalimmiuni sapaatiummat paasineqarpoq, arfininngormat tallimanngormallu 78-it 89-illu paasineqarlutik.

Uni Leitisstein Hansenip oqarnera naapertorlugu inuusuttut amerlasuut ataatsikkut tammaarsimaartinneqarnerat pissutaalluni tunillatsissimasorpasuupput.

- Meeqqat inuusuttullu amerlasuut katersuussimapput, amerlanerillu akiuussuserneqarsimanatik. Nappaat akiuussuserneqarsimasut akornanni taamaasilluni tuniluutilertorsimavoq, taakkualu angajoqqaatik tunillassimallugit, taanna oqaluttuarpoq.

3000-t ullormut misissortittartut

Savalimmiuni oqartussat nappaatip tuniluunnissaa pinaveersaarniarlugu sumiiffinni ataasiakkaani killilersuilerput.

- Sumiiffinni eqqorneqangatsiarsimasuni atuarfiit matuneqarallarput tamannalu iluaqutaanersoq malinnaavigineqarluni, inuillu coronamut aamma misissorterrapput. Inuit 3000-t pallillugit ullup unnuallu ingerlanerani misissorneqartarunarput. Tassa Savalimmiuni innuttaasut akornanni amerlasuut ullup unnuallu ingerlanerani misissorneqartarput. Inuillu amerlasuut ataatsikkut katersuutinnginnissaat oqartussat taassuma saniatigut aamma kaammattuutigaat, Uni Leitisstein Hansen nassuiaavoq.

Peqqinnissaqarfimmilu sulisut amerlasuut coronavirusimik aamma tunillatsissimanerat Savalimmiuni aamma ernumalersitsivoq:

- Sulisut amerlasuut coronavirusimik tunillanneqarsimanertik pillugu angerlarsimaannartariaqarnerat soorunami ajornartorsiulersitsvoq. Sapaatit-akunnerata naanerani uivernersuaqarpoq, aqutsinikkullu ajornartorsiuteqarsimanini nunatta nakorsaanerata nassuerutigaa, ullumikkulli neriulluarneruvoq. Pitsaanerusumik ingerlasoqalersoq isumaqarpoq. Inunnilli tunillaassuunnermik misissuissanik Danmarkimit ikiorneqarnissartik Savalimmiuni oqartussat kissaatigisimavaat, Uni Leitisstein Hansen, Kringvarp Føroyameersoq oqarpoq.

Savalimmiuni innuttaasut aqqaneq-marluleereersimasut 84 procentii akiuussutimik marloriarlutik kapitereerput.

Savalimmiuni innuttaasut 52.000-t missaanniipput.