Savalimmiuni aatsaat taama amerlatigisut tunillatsittut
Savalimmiuni covid-19-mik tunillanneqarsimasut aatsaat taamak amerlatigisut Savalimmiuni nutaarsiassaqartitsivik taama allappoq.
Piffissami kingullermi tuniluunneq sualulluinnarsimavoq, oktobarimmi 23-iani tunillanneqarsimasutut nalunaarsorsimasut 89-iusimagaluarput aqaguanilu oktobarip 24-iani tunillanneqarsimasut nutaanik 78-nik ilasimapput.
Taamaalilluni Savalimmiuni oktobarip 24-iani tunillanneqarsimasut katillugit 290-nngorsimallutik, oqaatigineqarporlu Savalimmiuni siornatigut ataatsikkut taamak sukkatigisumik tunillaassuuttoqarsimanngisaannartoq.
Savalimmiunilu naalakkersuisut tamanna pillugu killilersuisariaqalerput.
- Pisut malinnaavigaagut, naliliivugullu sumiiffik tuniluuffiunerpaaffiusoq iliuuseqarfiginiarlugu, Savalimmiuni Lagmandi Bardur i Steig Nielsen savalimmiut nutaarsiassaqartitsiviani taama issuarneqarpoq.
AAMMA ATUARUK Savalimmiuni corona tuniluuteriapiloortoq
Tunillatsittut amerlanerpaat nunap avannaata kangianeersuupput.
Savalimmiuni illoqarfiit annersaata tulliani, Klaksvik-imi, atuarfimmi atuartitsinissat sapaatip akunnerani killilersorneqalerput. Meeqqat 3. klasse tikillugu atuartut kisimik atualissapput, sinneri ungasianiit atuartsinneqassallutik.
Nunap avannaata kangisinnerusortaani gymnasia matugallarpoq, ilinniartullu ungasiannit ilinniartinneqalerlutik.
Savalimmiuni nakorsaaneq Lars Fodgaard Møller savalimmiut tusagassiorfiitigut paasissutissiivoq, tuniluunneq meeqqat inuusuttullu akornanni annermik ingerlaartoq. Savalimmiuni inuusuttut Savalimmiut iluani sumiiffinni tamaneersut katerisimaarnersuarmik pikialaaqatigeeqqammerput.
Ukioq ataaseq sinnerlugu piumasarineqarpoq Savalimmiunut iserniartut tamarmik killeqarfimmi misissorteqqaarlutik aatsaat isersinnaassasut, piumasarineqartullu tamatuma septembarip aallaqqaataani atorunnaarsinneqarnerata kingorna tuniluunneq qaffakkiartorusaalersimavoq.
Savalimmiuni innuttaasut 70 procentii marloriarlutik akiuussusertissimapput, 73 procentiilu ataasiinnarmik akiuussusertissimallutik. Nualluutillu takkunnerata kingorna Savalimmiuni inuit marluk covid-19-mik toqquteqarsimapput.
