Politikki Inuussutissarsiutit Nunanit allanit

Savalimmiuni aalisarnermut inatsit naalakkersuisuni ilungersunartorsiortitsisoq

Aalisarnermut inatsisissaq pillugu isumaqatigiinniarneq Savalimmiuni politikkikkut nikkittoqarnissaanik kinguneqarsinnaavoq. Qinersisoqariataassappammi partiit illuatungiliuttut ajugaasussaapput.

Allattoq Jonas Fievé

oktobarip 27-at 2018 18:24

Nutserisoq Paninnguaq Steenholdt

Ningittagarsornikkut pisassiisarneq ukiumi nutaami atuutilerneqarnissaa imaluunniit inatsit ullumikkut atuuttup, tassa pisassiissuteqarani ullut aalajangersimasuinnaat aalisarsinnaanerup ingerlatiinnarneqarnissaa isumaqatigiissutiginiarneqarput.

Ningittagarsornermi pisassiisarnerup atuutilerneqarnissaa socialdemokraatit Javnaðarflokkurin republikaanerillu Tjóðveldi taperseraat naalakkersuisooqatigiinneersut partii Framsókn-ip pisassiisalernissamut inatsit kinguartikkusuppaat.

AAMMA ATUARUK Savalimmiuni aalisarneq pillugu aaqqissuusseqqinnissaq akuersissutigineqartoq

- Inatsit nutaaq januaarip aallaqqaataani 2019-imi atuutilissappat piffissakippallaartoq taamaammallu suliaq kinguartinneqassasoq, Framsókn isumaqarpoq. Akerlianilli Lagmandenip suliaq sulissutigigaa oktoberimilu siunnersuummik saqqummiussiniartoq, Kringvarp Føroyami tusagassiortoq Beinta Løwe Jacobsen oqarpoq.

Siunnersuulli suli saqqummiunneqanngimmat, partii Framsókn namminneq siunnersuusuusiorput tamannalu naalakkersuisuni ilungersunartorsiortitsivoq.

Beinta Løwe Jacobsen naapertorlugu susassaqarfiit arlallit savalimmiuni naalakkersuisunit isumaqatigiinngissutaareermata qinersisoqaratarsinnaavoq.

- Lagmanden aningaasanut inatsisissamut siunnersuummik amerlanerussuteqarani saqqummiussivoq, Beinta Løwe Jacobsen oqarpoq.

AAMMA ATUARUK Aalisarnerup aaqqissuuteqqinneqarnissaa illuatungilerneqarpoq