Savalimmiut: Aalisarnerup aaqqissuuteqqinneqarnissaa illuatungilerneqarpoq
Savalimmiuni aalisarnerup aaqqissuuteqqinneqarnissaa pillugu ukioq manna aggustimi isumaqatigiissusiortoqaraluarpoq, amerlanerussuteqartummi, 17-it, Savalimmiuni inatsisartuni Lagtingimi amerlanerussuteqartut akuersipput.
Naalakkersuisulli siunnersuutaat Lagtingimi saqqummiunneqarmat paasinarsivoq amerlanerussuteqartunit tapersersorneqanngitsoq.
AAMMA ATUARUK Savalimmiormiut naalakkersuisortaarput
Parteeqataasa ilaat illuatungiliipput
Aksel V. Johannesenip partiia sinnerlugu ilaasortat ilaat illuatungiliipput. Savalimmiuni tusagassiorfiup Kringvarp Føroyap tusagassiortua Beinta Løwe Jacobsen taama oqarpoq:
- Pisassiissutit ilaasa akitsorterussinikkut tunineqarsinnaanissaat ajornartorsiutaavoq. Socialdemokratillu ilaasortaatitaasa ilaat tamanna akerleraat, Beinta Løwe Jacobsen oqarpoq.
AAMMA ATUARUK Savalimmiuni tunngaviusumik inatsisissatut siunnersuut itigartitsissutigineqanngitsoq
Qinersisoqarnissaa pinngitsoortinniarpaa
Partiit illuatungiliuttut annerit marluk Sambandspartiet Folkeflokkenilu sapaatip-akunnerata naanerani ataatsimeersuarput, inatsisartunut qinersisoqarnissaanut atatillugu piareersaasiortoqarnissaa qitiulluni.
Aksel V. Johannesenilli qinersisoqarnissaanut nalunaaruteqarnissaanut siusippallaarunartoq, Beinta Løwe Jacobsenip oqaatigaa:
- Partiip Centerpartietip naalakkersuisoqatigiinnut ilaalernissaa maanna periarfissrasiussavaa, iluatsissanersorlu paasinarsiumaarpoq. Attaveqaqatigiillatsiarsimapput. Partiit naalakkersuisoqatigiinniittut siuttui ippassaq ataatsimiipput, qanorli pisoqarsimanersoq, inerneralu suunersoq, suli saqqummiunneqanngilaq. Maangaannarlu qinersisoqarnissaa pinngitsoortinniarlugu periarfissat allat ujartorneqartut ilimagaara, Kringvarp Føroyap tusagassiortua Beinta Løwe Jacobsen oqarpoq.