Savalimmiormiut tuluillu niueqatigiinneq pillugu isumaqatigiissuteqartut
Isumaqatigiissut piffissami sivisujaami naammassiniarneqarpoq. Savalimmiuni niuernermut nunanullu allanut naalakkersuisup Poul Michelsenip januaarimi nalunaarutigaa isumaqatigiissut naammassineqartoq.
Taava ippassaq isumaqatigiissut Poul Michelsenip aamma tuluit niuernermut ministeriata George Hollingberyp aamma aalisarnermut nunalerinermullu ministerip George Eusticep atsiorpaat.
Brexit pillugu juunimi 2016-imi inunnik taasititsisoqarneraniilli Savalimmiut killiligaanngitsumik niueqatigiinnermut isumaqatigiissusiornissaq ukkataralugu suliaraat. Savalimmiut 2016-imi Tuluit Nunaannut 850 millionit koruunit nalinginut tunisaqarput.
AAMMA ATUARUK Niueqatigiinneq pillugu isumaqatigiissuteqarnissaq Brexitip kingorna aatsaat pisinnaasoq
Nunatta Tuluit Nunaannut tunisai aamma taama annertussuseqapajaarput, nunarpulli Savalimmiutut killilersugaanngitsumik niueqatigiissinnaanermik massakkut isumaqatigiissuteqarsinnaanngilaq.
Nunanut Allanut Naalakkersuisoq Ane Lone Bagger siusinnerusukkut KNR-imut paasissutissiivoq Kalaallit Nunaat Tuluit Nunaannut killiligaanngitsumik niueqatigiinnermut nuna EU-mit anitinnagu isumaqatigiissusiorsinnaanngitsoq.
Taamaattorli Tuluit Nunaannut aallarniutaasumik oqaloqatigiinnerit atorfilittatigoortumik aallarnerneqarput. Pingaartumik aalisarnikkut ingerlatsiviit angisuut Royal Greenland aamma Polar Seafood Tuluit Nunaannut annertuumik tunisaqartuupput.