Savalimmiormiut naalagaaffinngornissartik taasissutigeriaannaavaat
Politikkikkut pissutsit ukiuni tulliuttuni qanoq issanersut apeqqutaassaaq. Mads Lynge paasissutissiissaaq:
Savalimmiut naalagaaffinngorsinnaanissaat pillugu Savalimmiut Danmarkillu akornanni 2000-imi isumaqatigiinniarnerit ajalusoormata, Savalimmiut naalagaaffinngorsinnaanissaat pillugu pilersaarut Savalimmiuni politikerit nammineq pilersippaat.
Ataatsimoortumik tapiissutit annikillisikkiartuaartinneqarnissaat, Danmarkiminngaanniillu oqartussaaffigineqartut kingulliit tiguneqarnissaat pilersaarutaapput.
Ataatsimoortumik tapiissutit annikillisinnerisigut nikittussaajunnaarsinnerisigut alloriarnerit siulliit tiguneqarput.
Partiili naalagaaffinngornissamik tapersersuinerpaajusut Republikanerit naalakkersuisoqatigiinnut 2004-mi ilaasortaajunnnaarput, Savalimmiormiullu naalagaaffinngornissaat oqallisaavallaarunnaarluni.
Republikanerilli partiini maanna annersanngornikuupput, naalakkersuisuutitaqalissagunillu naalagaaffinngornissamut pilersaarutit ukiut tallimat ingerlaneranni naammassiniarlugit oqarput. Tassa imaappoq: Savalimmiut naalagaaffinngorsinnaanissaat pillugu innuttaasunik taasisitsinissaq ukiut tallimat ingerlaneranni pisinnaassasoq, Republikanerit siulittaasuat Høgni Hoydal Radioaviisimut oqarpoq:
- Torersumik tamanna naammassineqarsinnaassappat, ukiut tallimat iluanni tamanna pisinnaanissaa piviusorsiorneruvoq. Naalakkersuisut ukiaru taarserneqassappata, qinersiviup ataatsip iluani tamanna pisinnaassaaq. Oqartussaaffiit tigusinnaassavagut, ataatsimoortumillu tapisiat annikillisinnaassallutigit. Taamaalinikkut naalagaaffinngornissaq pillugu innuttaasunik 2014-imi taasisoqarsinnaassaaq, Høgni Hoydal oqarpoq.
Danmarkilli Savalimmiullu avissaavinnissaat siunniunneqanngilaq, assigiinngitsutitigut suleqatigiittoqarsinnaanissaa takorloorneqarmat.
- Danmarkimi Savalimmiunilu innuttaasusillit assigiimmik pisinnaatitaaffeqarnissaat takorloorneqarsinnaavoq, soorlu aamma nunanut allanut tunngassuteqartunut illersornissamullu tunngaasuteqartunut suleqatigiittoqarsinnaassasoq. Nunap aningaasassai aamma eqqarsaatigisariaqarparput. EU-mut ilaasortaanngikkaluarluta Euro atorusupparput, isumaqatigiinniutigineqartariaqassallunili. Suleqatigiittoqassaaq, attaveqatigiinnerli allanngortariaqarpoq. Angajoqqaat meeqqamut pissusilersornerattut ikkunnaarluni qatanngutigiittut naligiilluni attaveqatigiittoqartariaqarmat, Høgni Hoydal oqarpoq.
Danmarkip Savalimmiunut ataatsimoortumik tapiissutai ukiumut 615,5 millionit koruuniupput, taakkua Savalimmiuni aningaasarsiornerup 5 procentiisa missigai.
