Savalimmiormiut aalisariutaat kivisoq: Inuttat marluk suli maqaasineqarput
Savalimmiormiut aalisariutaat marlunngormat kivivoq. Aalisariut Kambur silarlunnerani malerujussuarmit eqqorneqarnermi kingorna kivivoq.
Inuttat 14-it qimagutitinneqarput marlulli malinni tammarlutik.
Inuttat taakku marluk tallimanngornermi suli maqaasineqarput. Savalimmiuni imaani annaassiniarnermi ataqatigiissaarivik MCRR Tórshavn KNR-imut paasissutissiivoq.
Umiarsuit, qulimiguulik timmisartorlu atorlugit ujaasineq annertooq marlunngornermi aallartinneqarpoq. Inuttalli marluk nassaarineqanngimmata ujaasineq maanna annikinnerulerpoq.
Umiarsuit alapernaarsuutit marluk timmisartorlu attartugaq danskinit pigineqartoq sumiiffimmi ujaasisut, MCRR Tórshavnip paasissutissiissutigaa.
Umiarsuaq Suderoyip kujataani 17 sømilimik ungasissuseqartumi kinngusoq, tusagassiorfik, Maritime Danmark marlunngornermi allappoq.
Suderoy Savalimmiuni qeqertat kujasinnerpaartaraat.
Inuttat umiarsuup silapilunnerani malerujussuarmit eqqugaanerata kingorna oqartussanut Savalimmiuni nalunaaqutaq arfininngunngitsiartoq kalerriipput.
Qulimiguulik umiarsuarlu annaassiniartartut Suderoyip kujataanut erngertumik aallartinneqarput. Qulimiguullip inuttat 13-iusut siullermik qimagutitippai nunamukaallugillu.
Qulimiguulik tamatuma kingorna uteqqippoq, inuttarlu ataaseq aamma annaallugu.
MCRR-ip umiarsuit alapernaarsuutit atorlugit ujaasineq aqagu nanginneqassasoq paasissutissiissutigaa. Inuttalli marluk nassaarineqanngippata sapaatiuppat qanoq iliussanerlutik suli aalajanginngilaat.