Sauwestari Koda Awardsimik nersornaasitinneqartoq
Isumalluarnartumut nersornaat ukioq 2024 tassaavoq… MUK.
Nipilersuusiortartoq, nipilersortartorlu, Anda Otto Schmidt ukioq manna Koda Awards 2024-mit nersornaasiunneqartunik siullermik nersornaaserneqartussatut nuaarutigineqarmat taama oqaasertaqarpoq. Nersornaasiisoqarnerani Sisimiuni kulturikkut illorsuaq Taseralik ersaattaannernik, guitarpalummik tumerparpaarpalummillu nipinik ulikkaarpoq.
Isumalluarnartumut nersornaat erinniullaqqissumut, taalliullaqqissumut nipilersoqatigiinnulluunniit isumalluarnartunut tunniunneqartarpoq.
Nipilersoqatigiit MUK isumalluarnartumut nersornaammik ukioq manna nersornaaserneqarput, tassanilu saqqummersitaat "Ingerlavunga" nersorniarneqarluni.
Nipilersoqatigiinni ilaasut tallimat nuannaaqalutillu attortisimapput, naasunik nersornaammillu tigummiarlutik nersorneqarnerminnut qujapput:
- Siullermik qujanaq tapersersuisartunut, ilaquttat maaniittut, taavalu uani najuussinnaanngitsut, nipilersoqatigiit ilaat attortisimasoq oqarput.
Sauwestari nersornaaserneqartoq
Koda Awards nunatsinni ukiut tamaasa aaqqissuunneqartarpoq, tassanilu kalaallit nipilersornikkut saqqummersitaannik Kodamit nersornaasiisoqartarluni. Koda Awardsit Nuummi siorna tunniunneqarput, Sisimiunilu ukioq manna nersornaasiisoqarluni.
Isumalluarnartumut nersornaasiisoqarnerata saniatigut ukioq manna Koda Awardimik aamma tunniussisoqarpoq. Taalliortumut erinniortumullu nersornaasiisoqarpoq.
Qeqqata Kommuniani borgmesterip Malik Berthelsenip pissanngatigineqaqisumik nalunaarutigaa nipilersoqatigiit Sauwestari ukioq manna nersornaatisissasut:
- Sauwestarimiit toqqagaanitsinnut qujanarujussuaq, minnerunngitsunik aamma tusarnaartartunut, tapersersuisunut nuannarinnilluartunullu qujanarujussuaq, nipilersoqatigiit oqarput.
Nipilersoqatigiit MUK piffissami qaninnermi aamma tusarnaariarneqarsinnaapput, Sisimiuni Arctic Sounds Festivalimi marsip ulluisa 30-anni tusarnaariarneqarsinnaallutik.
Koda Awards 2024-lu isiginnaarsimanngikkukku nittartakkatsinni KNR.gl-imi isiginnaarneqarsinnaavoq.
