Årets Koda Awardsip pitsaanerpaamik ukioq manna saqqummiisoq nersornaasissagaa

Kalaallit nipilersornikkut saqqummersitaannik ukiumoortumik nersornaasiisoqangajalerpoq.

Ukiumut nersornaammut aamma Isumalluarnartumut nersornaat ukioq manna tunniunneqaqqissapput. Koda Awards tusagassiuutinut nalunaarummi allappoq.

- Nipilersornerup imarpissuatigut pissanganarluinnartumik angalatitaasimavugut, misigisagullu imaannaasimanngillat.

- Innersuussiniarnissamut suliaq qilanaaqaluta 2023-mi saqqummersitat tusarnaarsimavagut, tusarnaakkattali tamatta qitaasartituarluta ilukkut aalassatsittuarsimavaatigut saqqummersitat tiguartinnangaarmata.

Innersuunneqartut ukuupput:

Nersornaasiinissamut naliliisartut nersornaatinut marlunnut pingasunik innersuussaqarput:

Ukiumut Nersornaammut innersuunneqartut tassaapput:

• VARNA GL saqqummersitaq”Pilarngar” pillugu 
• Sauwestari saqqummersitaq ”Sauwestari” pillugu
• Sound of the Damned Saqqummersitaq “Atornerlunnanga” pillugu 

Isumalluarnartumut Nersornaammullu innersuunneqartut tassaallutik:

• Rene Brandt saqqummersitaa ”Ivé” pillugu 
• Najaaraq Fleischer saqqummersitaa ”Blue” pillugu 
• MUK saqqummersitaa ”Ingerlavunga” pillugu 

Koda Awardsinnassimasut akornanni taalliortoq, Gustav Lynge Petrussen siorna nersornaaserneqartoq aamma Ole Kristiansen siullerpaalluni 1991-imi nersornaaserneqarsimasoq nassaassaapput.

Ukioq manna nersornaaserneqartussaq pissangatigineqarallassaaq, Sisimiuni marsip 23-ani nersornaasiisoqassaaq.