Sarfaq Ittummi ilaasut: Inuit nipaarutiivipput
Sarfaq Ittummi ilaasut ilaat Paamiuni sisamanngornermi niusut coronavirusimik tunillatsissimasinnaammata ilaasut umiarsuarmi ineeqqaminni ippassaq mattusimatinneqalerput. Qaqortumi aasarsioreerlutik Nuummut angerlartut ilaat angalanerminni taamak pisoqarnera tupaallaatigaat.
Sarfaq Ittuk ullaap tungaa Nuummut tulappoq. Ilaasullu Qaqortumiit angalasut immikkuullarissumik misigisaqarput.
- Ulloq siulleq naliginnarmik angalavugut, tassanngaannaq oqaramik ineeqqatsinniiginnartariaqalertugut, ullormiit ullormut.
Qaqortumi coronavirus tuniluutereersoq Sarfaq Ittuk pingasunngornermi avannamukarluni aallarpoq.
AAMMA ATUARUK Inuit 250-t misissortissasut: Qaqortumi tunillatsissimasoq nipilersortunik tusarnaariarsimasoq
Ilaasullu ilaat Paamiuni sisamanngormat niusut tunillatsissimasinnaanerinik pasitsaassaqartoqarmat umiarsuarmi ilaasut tamarmik mattussaapput.
- Soorlu umiarsuaq inoqanngitsoq nipaarukkami, meeqqat arpaqattaaraluarlutik aamma tamarmik nipaarukkamik.
Taamatullu pisoqarnera immikkuullarippoq. Ilaasunullu ernumanarluni.
- Siullermik ernumavallaanngikkaluarpunga, soorunami coronartoqartoq paasillugu ulloq naliginnaasutut atoraluarlugu kisianni tassanngaanna suna tamaaviat mumeriasaarami.
- Soorunami eqqarsaaterpassuit, ilaa WC ataatsimoorussaagami taava attornerlugit, soorunami sapinngisamik.
Ullaarli Nuummut tulanniariarlutik ilaasut misissortikkiartorput.
Nuummilu niusut ataasinngorpat tungaanut angerlarsimaannarallarnissaat piumasaqaataavoq. Qaqortumit ilaasut sinneri misissortinnermik kingorna Sarfaq Ittummut utissapput.
AAMMA ATUARUK Ilaasut tallimanngornermi ullaap tungaani misissortissapput
Ilaasut Narsami, Arsummi imaluunniit Paamiuni ikisut Nuummi niusinnaapput angerlarsimaannaqqusaassallutilli. Ilaasut taakku aatsaat ataasinngorpat misissortissapput.
- Neriuppunga soorunami soqanngitsoq. Eqqugaasussat amerlanermik aamma ilaasut amerlagatta.
Ilaasortaammimi avannamukaartut ilaasut 155-it mattussaallutik eqqugaaqqapput, coronavirusertoqassappallu eqqugaaratarsinnaasut amerlasinnaaneri ilaasut ilaata ernummatigaa.
- Saneqqunniaraani sumiikkaluaraanniluunniit inuit qanikkatta. Kisianni soorunami tamatta kutaartornatalu eqitaarnatalu pinngilagut, tamatta maskeqarpugut aqqutaa tamaat, ikinitsinninngaanniit atorparput.
Umiarsuaq Nuummiit avannamut unnugu pilersaarutaasumik aallartussaagaluarpoq, tamannali qaqugu pissanersoq suli nalunarpoq. Umiarsuarmimi ilaasut tamarmik misissortinnerisa inerneri utaqqineqaqqaassapput.
Coronavirusip tuniluutilernerani, innuttaasorpassuit soorlu Qaqortumiittut, Sisimiuniittut, Nuummiittut, Sarfaq Ittummilu ilaasut misissortinnerisa inerneri paasiniarlugit peqqinnissaqarfimmiit ulappupput. Taamaattumillu akissutisiniarneq ulluni makkunani sivisunerusinnaasoq oqartussanit oqaatigineqarpoq.
Sarfaq Ittuk pillugu killiffik Arctic Umiaq Linep Facebookikkut quppernerani aamma malinnaavigineqarsinnaavoq.
