Ilaasut tallimanngornermi ullaap tungaani misissortissapput
Sarfaq Ittummi ilaasunik tunillatsisimasoqarsorineqartoq ullaakkut Nuummut tikippoq.
Ilaasut sisamat pingasunngornermi Sarfaq Ittummut Qaqortumi ikisut Paamiunilu sisamanngornermi niusut, Paamiunut tikinnerminni ersiuteqarnerat pissutigalugu angerlarsimaannaqqusaagallarput. Taamaammat pisortat ilaasut akornanni tunillatsittoqarsimasinnaanera ernumassutigaat.
Ilaasut 26-t Paamiuni ippassaq niupput taakkulu tamarmik ullumikkut misissortissapput. Misissortinnerisalu akissutissarsinissaasa tungaanut angerlarsimaannaqqusaapput.
Ilaasut Qaqortumi ikisut pilersaarutillu malillugit Nuuliartut ullaap tungaani misissortereerunik niusinnaapput.
Arctic Umiaq Line taama nalunaaruteqarpoq.
- Ilaasullu taakku ataasinngorpat tungaanut angerlarsimaannarnissaannik peqquneqassapput misissorteqqinnissamik tungaanut. Ilaasut taakku misissortinnerminni tunillassimanngitsut paasineqarpat angerlarsimaannaqqusaanerat atorunnaassaaq. Qaqortumit ilaasut sinneri misissortinnermik kingorna Sarfaq Ittummut utissapput.
AAMMA ATUARUK Sarfaq Ittummi ilaasunik tunillatsisimasoqarsorineqartoq
Ilaasut Narsami, Arsummi imaluunniit Paamiuni ikisut Nuummi niusinnaapput angerlarsimaannaqqusaassallutilli. Ilaasut taakku aatsaat ataasinngorpat misissortissapput.
Ilaasullu pilersaarutit malillugit Nuumminngaanniit ingerlaqqittussat apuuffissaminnut apuutereerunik aatsaat misissortissapput, tamannalu ataasinngorpat pissaaq.
Sarfaq Ittuk Nuumminngaanniit tallimanngornermi unnukkut nalunaaqutaq 20:00 aallassanersoq aatsaat paasinarsissaaq tallimanngornermi misissuinernit paasisat tunngavigalugit oqartussat nalilersuereerpata.
- Ilaasut Nuumminngaanniit tallimanngornermi unnukkut aallarnissaminnut billetseqartut Arctic Umiaq Linep Facebookkimi qupperneratigut pisunik malinnaaqquneqarput. Angalanissamut pilersaarutinik allanngortitsinissaq kissaatigineqarpat Arctic Umiaq Line info@aul.gl-ikkut attavigineqarsinnaavoq.
Umiarsuaq 155-inik ilaasoqarluni 21-nillu inuttaqarluni Nuummut tikippoq.
