Inuit 250-t misissortissasut: Qaqortumi tunillatsissimasoq nipilersortunik tusarnaariarsimasoq

Qaqortumi massakkuugallartoq pingasut tunillanneqarsimapput. 

Coronavirsuimik tunillanneqarsimasut ilaat Qaqortumi Rockhousemi nipilersortunik tallimanngorneq juulip qulingiluaanni tusarnaariarsimasoq, tunillaassuussimanermik misissuinermi paasineqarpoq. 

Tusarnaartitsisoqareersoq tunillaassuussimanissaanik misissuinermi inuit tusarnaariarsimasut pingasut tunillanneqarsimasut paasineqarpoq. Inuit 250-it tusarnaariarsimapput. 

Naalakkersuisut tusagassiuutinut nalunaarummi taama allapput. 

Maanakkullu nipilersortunut tusarnaariarsimasut tamarmik angerlarsimaannarnissaat coronavirusimullu misissortinnissaannut pisortaniit piumasarineqarpoq. 

- Tusarnaartitsinermi najuussimasut angerlarsimaannarnerup misissortinnerullu saniatigut mianersorluarnissaat aammalu inoqatiminnut qanillinaveersaarnissaat kaammattuutigineqarpoq, aamma misissortinnermi tunillanneqarsimanngitsutut inerneqarsimagaluarpat, misilittakkammi takutippaat tunillanneqarsimasut ullut tallimassaanni misissortinnermi tunillanneqarsimanngitsutut inerneqariarlutik kingusinnerusukkut tunillanneqarsimasutut inerneqalertarsimasut, Naalakkersuisut allapput. 

Qaqortumi misissortinnissamut inniminniiniaruit sianersinnaavutit e-mailerlutilluunniit uunga qaqshv@peqqik.gl.  Aqqit, inuup-normua, najugaqarfiit oqarasuaativillu normua ilanngullugu allassavatit.

- Peqqinnissaqarfimmiit attavigineqarumaarputit, sukkanerpaaq atorlugu misissorneqarumaarputit.

Nuna tamakkerlugu inuit 16-it tunillanneqarsimapput.

Ilulissani ataaseq, Sisimiuni arfinillit, Nuummi ataaseq, Qaqortumi arfinillit, Narsami ataaseq Narsarsuarmilu ataaseq.