Sara Olsvigip naalakkersuisut naveerpai
Ukiormi manna Danmarkimi Kalaallit Illuutaasa kalaallinut Danmarkimi atugarliortunut suliniutaat suli ingerlanneqarsinnaanersut ilisimaneqanngimmat ilaatigut naammagittaalliutigaa.
Taamaammat naalakkersuisut Danmarkimi atugarliortunut aningaasaliissutaat satspulje-nik taagorneqartartut aqqutigalugit Kalaallit Illuutaasa iliuuseqarfiginissaat, siunissarlu ungasinnerusoq isigalugu ataavartumik aningaasaliiffigineqartarnissaat Sara Olsvigip ujartorpaa.
Aamma aatsitassarsiornerup inerisarneqarnera Sara Olsvigip oqaaseqarfigaa, tassanilu qallunaat kalaallillu ilisimatusarnikkut suleqatigiinnerulernissaat ujartorlugu.
- Kalaallit Nunaannimi ilisimatuussutsikkut misissuinermut kommissioni atorunnarsinniarneqarpoq. Aningaasallu tassunga tuttussaangaluit suli ikilerinerullugit Kalaallit Nunaanni sullissiviusunut nussorneqaannarsimallutik. Aamma qallunaat kalaallillu ukiorpassuarni ilisimatusarnikkut suleqatigiissutigisimasaat sunnguamilluunniit nutarsaavigineqanngerluinnarpoq, Sara Olsvig oqarpoq.
Aamma Kalaallit Nunaanni imaani annaassiniarnermut sullissisut, tassa qallunaat imarsiortui, ukiortaamiit soriarsinnaajunnaassammata qallunaat naalakkersuisuisa suli qanoq iliuuseqarfigisimanngimmassuk sakkortuumik isornartorsiorpai.
- Ministerimmi arlallit tamanna pillugu juulimili apeqquteqarfigisaraluarpakka, akineqarnerlu ajuillunga. Aamma imaani annaassiniarnermut tunngassutillit aappaagumut aningaasanut inatsisissamut ilaatinneqarnersut apeqqutigivakka, aatsaallu sapaatip akunnerani uani akineqarpunga, asulu akissutigineqartoq imaqanngilluinnartutut taasariaalluni, Sara Olsvig assuarinnippalaarluni taama oqarpoq.
Aamma Kalaallit Nunaanni pineqaatissinneqarsimasut inissiiviisa kipiluttunartorsiorfiunerat oqalugiarnermini iserfigaa. Naallu Kangerlussuarmi utaqqiisaangallartumik inissiiviliortoqarsimagaluartoq, taassuma utaqqiisaangallartumik aaqqiissutaanera nittarsaappa.
- Pineqaatissinneqarsimasunut inissiivioreersut allilerneqartariaqarput nutarsarneqartariaqarlutillu. Pineqaatissinneqarsimasunummi sulisunullu atugassarititaasut Danmarkimi parnaarussivinni atugassarititaasunut nallersuuttariaqalerput, Sara Olsvig taama naqissusiivoq.
