Naalagaaffiit Peqatigiit innersuussuteqarnerat: Olsvigip ajornartorsiutit ilisarisinnaalluarpai
Meeqqat atugaat pisinnaatitaaffiilu pitsanngorsarneqassappata pisortat akisussaaffimmik kivitseqatigiittariaqartut, isumaginninnermut naalakkersuisoq isumaqarpoq.
Naalakkersuisullu innersuussutigineqartut ilisarisinnaalluarpai.
- Ilisarnartorpassuupput uani innersuussutaasuni aamma suliarineqaqqusaasuni. Isumaqarpungalu amerlasuutigut iliuuseqarfigalugit ingerlareersugut kisiannili aamma takusinnaallugu pitsaanerusumik naammassisaqartariaqartugut, isumaginninnermut naalakkersuisoq, Sara Olsvig, taama oqarpoq.
Kalaallit Nunaat Naalagaaffiit Peqatigiinni meeqqat pisinnaatitaaffii pillugit isumaqatigiissummut ukioq manna misilitsippoq.
Nalunaarusiami allassimavoq, meeqqat kinguaassiutimikkut atornerlunneqarsimasut sumiginnarneqarsimasullu oqartussanit ikiorneqarnerat naammanngitsoq, naak meeqqat ikiorneqarnissaminnut pisinnaatitaaffeqaraluartut.
AAMMA ATUARUK FN-ip nalunaarusiaata suli suliassaqangaatsiartoq takutippaa
Meerarli sumiginnarneqartoq kanngutsaatsuliorfigineqarsimasorluunniit pisortanit ikiorneqassappat meeqqanik qanimut sullitallit, qinikkat innuttaasullu allat nalunaartussaatinaanertik eqqaamassagaat, Olsvig oqarpoq:
- Meeqqat sumiginnagaasut iliuuseqarfigineqassappata taava aamma pisortanit ilisimaneqartariaqarpoq meeraq taanna sumiginnagaasoq. Tassanilu inersimasut tamatta akisussaaqataanerput eqqumaffiginerulertariaqarparput.
Kommunilli meeqqanik sumiginnakkanik ikiorsiinissaminnut piginnaasaat nukittorsarneqartariaqartut, Naalagaaffiit Peqatigiit aamma innersuussutigaat.
Kommunilli isumaginninnermut aqutsisoqarfimmit ukiortaami pilersinneqartumit ikorfartorneqarsinnaalertut, naalakkersuisup tikkuarpaa:
AAMMA ATUARUK Nunarput nalunaarusiamik Naalagaaffiit Peqatigiinnut tunniussisoq
- Kommunit qanoq ikorfartorneqartigisariaqarnerannik uagut ilisimasaqarluinnarnerput oqaatigerusuppara. Taamaammat nukipparujussuit pikkorissaanernut kommininullu suleriaatsinik pitsanngorsaanernut atorpagut, Sara Olsvig oqarpoq.
Aamma nutaamik inatsiseqarpoq, meeqqqanik inuusuttunillu sumiginnaasoqarsimatillugu pisortat nalunaaquttap akunneri 24-it qaangiutsinnagit iliuuseqartarnissamik pisussaaffiliisumik.
Naalakkersuisorlu isumaqarpoq, inatsisikkut nutaakkut meeqqat pisariaqartitaminnik ikiorneqarnissaat qulakkeerneqarsinnaasoq.
Kommunilli nalunaarutigineqartunut siusinnerusumi iliuuseqartassappata, amerlanerusunik isumaginninnermi siunersorteqartariaqartoq, Sara Olsvigip nassuerutigaa.
