Meeqqat pisinnaatitaaffii: FN-ip nalunaarusiaata suli suliassaqangaatsiartoq takutippaa
Pitsanngorsaanissamut innersuussutit piviusunngussappata Nunatta politikerii suliassaqarluarput. Tassami Nunatsinni naalakkersuisut ilaatigut piumaffigineqarput, nunat tamalaat meeqqat pisinnaatitaaffii pillugit isumaqatigiissut malissagaat.
Tamassuma saniatigut innersuussutit pingaaruteqartut allat makkuupput:
Nalunaarusiami ilaatigut allassimavoq, meeqqat kinguaasiutimikkut atornerlunneqarsimasut oqartussanit ikiorneqarneq ajortut, naak meeqqat ikiorneqarnissaminnik pisinnaatitaaffeqaraluartut. Tamanna pillugu Meeqqat pillugit ataatsimiittartoqatigiivi innersuussipput, kommunit ikiorsiinissaannut piginnaasaat nukittorsarneqassasut, taamaaliornermi meeqqanik innarliinerit siusissukkut paasineqartassammata aamma meeqqat ikiorneqartarnissamik illersorneqarnissaminnillu pisariaqartitaat sulissutigineqapallattassammata.
Meeqqat angerlarsimaffimmi avataanut inissinneqarsimasut - taakkununnga ilaallutik meeqqat innarluutillit - tusaaniarneqarnerunissaat innersuussutit pingaaruteqarlurtut ilagaat.
Tamannalu pillugu FN innersuussivoq, meeqqat ajornartorsiuteqartunik angajoqqaallit meeqqaminnillu iluamik paarsisinnaanngitsut oqartussanit ikorfartorneqarluartarnissaannik, taamaaliornikkut meeqqat angajoqqaaminnit sivisuumik pisariaqanngitsumillu avissaaqqannginnissaat anguniarlugu.
Meeqqat inuusuttuaqqallu atornerluisut ikiorneqarnissannik ullumikkut neqeroorfigineqarneq ajorput. Tamassuma allanngortinneqarnissaa innersuussutaavoq atornerluinerullu pinaveersaartinneqarnissaanik suliniuteqartoqassasoq innersuussutaalluni.
Ilaqutariit akissaatikinnerit meerataasa naammattumik peqqinnartunillu ullut tamaasa nerisaqartinneqartarnissaat innersuussutaavortaaq aamma inuussutissanut akit ilaqutariinnit akissaatikinnerusunit akilerneqarsinnaanissaat innersuussutaalluni.
Naalagaaffiit Peqatigiit Meeqqat pillugit Isumaqatigiissutaata piviusunngortinneqarnissaa anguniarlugu, Naalakkersuisut nuna tamakkerlugu periusissiortariaqartut piumaffigineqarputtaaq, tamannalu meeqqat inuuniarnerisa pitsaanerulernissaanik, aningaasanik atugassanik missigersuusiortalerrnissamik taamatullu kommunit peqataatinneqarnerulernissaannik anguniaqaqqusinermik tunngaveqarluni.
Naalagaaffiit Peqatigiit nalunaarusiaat Meeqqat illersuisuannit atuarneqareerpoq, taassumalu innersuussutit tamaasa isumaqatigalugit oqarluni:
- Qitiusumiit arlalitsigut sukkasuumillu iliuuseqartoqartariaqarnera pisariaqaqisoq innersuussutit takutippaat. Meeqqat inuusuttullu arlalissuit persuttaanernik kinguaassiutitigullu atornerluinernik aqqusaagaqarsimaneri aallaavigalugit suliassaalersimasut iliuuseqarfigalugit aaqqiiffigineqartariaqarneri ilaatigut innersuussutasoq nuannaarutigaara. Aamma meeqqat angerlarsimaffiit avataannut inissinneqarsimasut pillugit suliassat aammalu meeqqat akornganni imminnut toqoriartarnerpassuarnut tunngasut eqqumaffigineqartut nuannaarutigalugu, Meeqqat Illersuisuat, Aviâja Egede Lynge tusagassiutinut nalunaarummini allappoq.
