ASSIT Saqqummersitsinermi politikkerit quissuaatigineqartunut ilaapput

<p><strong>Titartakkat inuiaqatigiinnik toortaagaangamik qungujutsitsisarlutillu eqqarsalersitsisarput. Quiassuatiginnilluni titartakkanik saqqummersitsineq Nunatsinni siullerpaaq eqqumiitsulianik katersugaasivimmi Nuummiittumi takuniaaffigineqarsinnaavoq.</strong></p>

Allattoq Ane-Marie Petersen, Paarnaq Hansen

decembarip 11-at 2015 16:03

Eqqumiitsuliortut Buuarsikkunnik titartaasup, Robert Holmenep, parkarsuakkunnik titartaasartup, Per Dankerip aamma quiassuaatiginnilluni titartaasartup allap Martin Brandt Hansenip, titartagaat takuniarneqarsinnaanngorput.

Saqqummersitat ilagaat titartagaq Inatsisartut siulittaasuata Lars-Emil Johansenip Nikku Olsen Inatsisartunut qinersinermi 2013-mi qinigaangaluarluni eqqartuussaanikuunera peqqutaalluni Inatsisartunut isinngitsoornera pillugu oqaaqqissaarisuusitikkaa:

Nalunngiliuk sooq isinnginnerlutit? Arnaq persuttassagukku isalaaginnarnagu unataruloorluassavat, Martin Brandt Hansenip titartakkani taama oqaasertalersimavaa.

Pineqartoq, Inatsisartut siulittaasuat Lars-Emil Johansen, ammaanersiornermi takuniaasut ilagaat.

- Inuit akornanniittutut inuugaanni, kikkunnik tamanik ilisimaneqartutut inuugaanni, taava piareersimaffigisariaqarpoq. Uanga ajorinngiivippara aamma isumaqarpunga nammineerlunga imminut illaatigisinnaasarlunga, Lars-Emil Johansen KNR-imut oqarpoq.

Uani ilanngutassiami oqaluttuarineqartumik quiassuaataasup aappaa, Nikku Olsen, oqaseqartinniarlugu attaveqarfiginiaraluarparput, iluatsinnaguli.

Aamma atuaruk Nunatsinni quiassuarneq pillugu saqqummersitsineq siulleq

Titartaasullumi aamma saqqummersitsineq naammagisimaarpaa.

- Isumaqarpunga quiassuarneq pillugu saqqummersitsineq nuannaarutiginartuusoq. Takutikkamiuk nunatsinni killiligaanani oqaaseqarsinnaaneq nukittuujusoq, Martin Brandt Hansen oqarpoq.

Annersinneqaraangatta nikeriarnerpaasarpugut

Eqqumiitsulianik katersugaasiviup pisortaata saqqummersitsinerup oqariartuutaa pingaaruteqartoq isumaqarpoq.

- Eqqarsarpunga, annersinneqaraangatta sakattarneqaraangattalu nikeriarnerpaasartugut, taamalu pineqarneq uatsinni isumaqarnerpaasoq. Annernanngippat isumaqanngippallu, taava titartaanissaq soqutaasimassanngilaq. pisortaq Nivi Christensen oqarpoq.

Aamma atuaruk Buuarsikkut aamma frimærkitut

Saqqummersitseqataasoq nalunnginneqarluartut Buuarsikkut Robert Holmene titartaasoraat. Taassumalu Buuarsi ukiut 25-it matuma siorna, tassa 1990-imi, siullerpaamik titartarpaa.

- Taamani titartaqqaarakku ilimaginngiivippata manna angussallugu. Tanngannaqaaq, Robert Holmene oqarpoq.

Saqqummersitat Nuummi katersugaasivimmut januarip 23-ata tungaanut alakkarneqarsinnaapput.