Nunatsinni quiassuarneq pillugu saqqummersitsineq siulleq
Titartaasartut pingasut, tassaasut Robert Holmene, Per Danker kiisalu Martin Brandt, quiassuaatigalugu titartakkatik saqqummersissavaat.
Per Dankerip quiassuaatigalugu titartagai ilisimaneqarluarput, tassami Parcarsuallit 1969-imili titartartaleramigit. Per Danker Sermitsiami 1969-imit 1982-ip tungaanut aaqqissuisuuvoq, Parcarsuallillu taamanikkut pilersillugit.
Robert Holmenep titartartagai aamma ilisimaneqarluarput, eqqumiitsuliortummi titartaasartullu tamatigoortup quiassuaaatigalugu titartagai tassaammata "Buuarsikkut", ulloq manna tikillugu suli titartagai. "Buuarsikkut" Nuuk Ugeavisimi siornatigut saqqummersinneqartarnikuupput, Facebookikkullu ulloq manna aamma malinnaavigineqarsinnaallutik.
Quiassuaatigalugu titartaasartuni taakkunani inuusunnerpaaq tassaavoq 25-nik ukiulik Martin Brandt. Taassuma titartagai Nuummi aviisimi sapaatip-akunnikkaarlugit siornatigut saqqumersartumi Tiu Tiumi takuneqarsinnaasarnikuupput, ulloq mannalu tikillugu suli aamma titartaasarluni.
Saqqummersitsineq "Nunatsinni Quiassuarneq" eqqumiitsulianut Nuummi katersugaasivimmi, Nuuk Kunstmuseumimi ullumi tassa ammarneqassaaq, januaarillu ulluisa 23-ata tungaanut takuniarneqarsinnaassalluni.
