Tunu anorersuartoq: - Sapaatip akunnera tamaat anorersuassaaq, pisinnaaguit meeqqatit angerlarsimatikkit
DMI-mit Tasiilami Kulusummilu marlunngornermi unnuaaneraniit pingasunngornermi nal. 14-ip tungaanut anorersuarnissaa aarlerisaarutigineqarpoq.
Anorersuarnerani ulussaarsuartut sakkortutigisumik anoraasuartassaaq, sekundtimut meterinik 33-38-nik sakkortutigisumik, taamaammallu kommuni mianersorniarluni aalajangerpoq.
Isumannaallisaaneq pissutigalugu atuarfiit, ulluunerani paaqqinnittarfiit pisortallu allaffeqarfii tamarmik marlunngornermi pingasunngornermilu matoqqassapput. Taama Kommuneqarfik Sermersooq nittartakkamini allappoq.
Sapaatip akunnera tamaat anorersuassaaq
- Utoqqaat sila anorilu pillugit ilisimasaqarluakkajuttartut isumaqarput, anorersuaq imaaniit aggersoq, Neqqajaaq, ukiut ingerlaneranni sakkortusiartuinnartoq, Hjørdis Vibergs, Kommuneqarfik Sermersooq Tasiilami sumiiffimmut pisortaq, oqarpoq.
- Ukiup taamaalinerani ukiarneraniit ukiornissaanut nikinnera Tasiilap eqqaani unerisimanngitsitsisarpoq, oqarpoq.
Sumiiffimmut pisortaq oqaluttuarpoq, atuarfiit, ulluunerani paaqqinnittarfiit pisortallu allaffeqarfii aqagu ammaqqinneqassasut innersuussutigaluguli periarfissaqaraanni meeqqat angerlarsimatiinnaqqullugit.
- Sapaatip akunnera tamaat anorersuassaaq, taamaammat periarfissaqaraanni meeqqat angerlarsimatiinnarnissaat innersuussutigaarput, oqarpoq.
Anorersuup sunniutai pillugit kommunip nittartagaatigut malinnaasinnaavutit, tassani ataavartumik nutarterisoqartassalluni.
Upalungaarsimasunit innersuussut
Anorersuarnerata nalaani upalungaarsimasunit innersuussutigineqarpoq kikkut tamarmik isersimaannaqqullugit. Anorimit atortut oqimaatsut tingissinnaanerisa, atortullu angisuut qangattaassinnaanerisa aarleqqutigineqarnera ilaatigut pissutaavoq.
Ajoqusersinnaanerit minnerpaaffissaanniitinniarlugit Tasiilami Kulusummilu innuttaasut anorersualinnginnerani tinngissinnaasunik sunilluunniit qajannaarsuinissaat upalungaarsimasunit innersuussutigineqarpoq.
Anorersuarnerani allanik peqateqarnissat kissaatigigukku anorersualinnginnerani ornigunnissat innersuussutigineqarpoq.
Anorersuarnerata nalaani upalungaarsimasunik attaveqartariaqassaguit uunga sianersinnaavutit 36 77 89.