Sannarlutat koruunit million-ilikkaanik nalillit
Naalakkersuisut isumaqarput inissiarpassuit aserfallatsaalineqartarsimanngisut ineqarnermut akiliut appasippallaartumut inissinneqartarsimammat. Ineqartut akiliutaat matussusiisinnaasimanngillat inissiat aserfallatsaalinissaannut, Ineqarnermut Naalakkersuisut Jens B. Frederiksen oqarpoq.
Inissialli amerlasuut maanna ajorsilluinnarsimanerannut sannarlunneq aamma pissutaavoq.
- Maannamut inissiat pitsaassusiat eqqarsaatigalugu inissiaatit amerlanerpaartaat ajoraluartumik naammaginanngilluinnarput, aammalu naluneqanngitsutut iluarsaassinissamut pisariaqartitsineq isusisassanngingajappoq. Tamatumunnga ineqarnermut akiliutit appasitsinneqarnerat, tamatumalu kingunerisaanik inissiat pisariaqartinneqartumik aserfallatsaaliorneqarnissaannut aningaasassaqannginneq attuumassuteqarluinnarpoq, Jens B. Frederiksen allappoq taamaallaallu qallunaatuuani aamma allallugu sannarlunneq aamma pissutaaqataasoq.
Knud Fleischer Kattusseqatigiit Partiianneersoq paragraf 37 tunngavigalugu apeqquteqartuuvoq. Taamatut apeqquteqarnermini ilaatigut ujartorpaa sannarluisarneq siunissami pinngitsoortinniarlugu Naalakkersuisut qanoq pilersaaruteqarnersut.
- Aallunneqartussat pingaarutillit allat tassaapput, sanaartornerup iluani ilinniartitaanerit ilinniaqqittarnerillu. Siunissami sanasunngortartussat sanaartornermi assersuutigalugu isugutaap aseruisarnerata, tamatumalu kingorna sanaartukkami naammassisumi oquttoqarsinnaanerata qanoq ililluni pinngitsoorneqarsinnaanissaanik ilinniarnissaat pingaaruteqarluinnarpoq, Jens B. Frederiksen allappoq.
Taassuma aamma ilisimatitsissutigaa Ineqarnermut, Attaveqarnermut Angallannermullu Naalakkersuisoqarfiup suleqatigiissitap immikkut ittunik ilisimasalinnik ilaasortaqartup, nunani issittuni sanaartornermik misilittakkanik ilisimasanillu ingerlatitseqqinnissamut suleqataasussap pilersinneqarnissaa pillugu soqutigisaqartunik attuumassutilinnik oqaloqatiginninnerit aallarniutaasut naammasseqqammerai.
