Sanaartugassanik suliassinneqartartoq sanaartornissamut ajugaasoq
MT Højgaardip Nuummi mittarfissuaq ima ilusilersorneqarsimasoq sanaartussavaa.
Sanaartugassanik suliassinneqartartup MT Højgaardip Nuup mittarfiani illut nutaat pingasut sanaartussavai.
Kalaallit Airports International A/S tusagassiutinut taama nalunaaruteqarpoq.
Illussat sananeqartussat tassaapput mittarfiup illorsuassaa, kiffartuussinermi illuliaq kiisalu timmisartunik tikittussanik aallartussanillu nakkutilliiffik.
AAMMA ATUARUK Kalaallit Airports: Kinamiut amerikamiullu timmisartui nunatsinnut mittassasut
- Qujanarpoq suliniutip ilaa taanna iluatsilluartumik suliariumannittussarsiuunneqarsimammat. Illuliat mittarfinnut suliniutinut pingaaruteqarput aamma nunanut assigiinngitsunut mittarfinni nutaani taakkunani sullissinerup pitsaassusianut ilaasullu misigisaannut pitsaassutsimik aalajangiissapput, Kalaallit Airports International A/S-imi suliniummi pisortaq oqarpoq.
- Mittarfimmi illulianik nutaanik sanasinnaatitaalernerput tulluusimaarutigaarput. Nunanut assigiinngitsunut mittarfik nutaaq Nuummut annertuumik pingaaruteqalersinnaavoq. Suliniut annertuvoq aamma soqutiginarpoq, tassani Kalaallit Nunaanni illoqarfinni aalajaatsumik attaveqarnerput nuannaarutigaarput, MT Højgaardip pisortaanera Jóannes Nicllassen oqarpoq.
Illuliassat pingasut illussanik titartaasartunit Zeso Architectsimit titartarneqassapput, illuliassallu pingasut taakku sisammik ilusilersorneqassapput, igalaanik oqitsunik, aluminiumillu immikkoortortanik tulleriillutik qallersorneqarlutik sananeqassallutik.
Mittarfiup illorsuartaa Nuummi qaqqat illoqarfimmik ungalusimasut aaqqissugaanerat ersersillugu qallersorneqassasoq tusagassiutinut nalunaarummi allassimavoq.
Sanaartornerup pilersaarusiornera iluatsissappat sanaartorneq aappaagu juulip aallaqqaataani aallartissaaq.
AAMMA ATUARUK Air Greenland Qaqortumi mittarfiup naalinissaa pillugu: Uatsinnut sunniuteqarnavianngilaq
Timmisartunik tikittussanik aallartussanillu nakkutilliiffiup 2022-mi juunimi sanaartorlugu naammassineqarsimanissaa pilersaarutaavoq, mittarfimmilu ingerlatsinermi atortussanik kiffartuussinermi illuliassap 2023-mi juunimi naammassineqarsimanissaa pilersaarutaalluni.
Namminersorlutik Oqartussat, Kalaallit Airports International A/S aqqutigalugu Nuummi Ilulissanilu mittarfiit nunanit tamalaanit tikinneqarsinnaasunngorlugit 2016-imili pilersaarusiulerpaat.
